L’Área de la Muyer del PP de Xixón entama una xornada sobre cultura y lliteratura asturianes

|

El Centru de Cultura Antiguu Institutu va acoyer el llunes una xornada sobre cultura y lliteratura asturianes entamada pol Área de la Muyer del PP xixonés. La mitoloxía, la llingua y la lliteratura con firma femenina protagonicen les actividaes.
 
“L'oxetivu d'esta iniciativa ye contribuyir a la promoción de la llingua y la cultura de la nuestra comunidá autónoma, asina como reflexar la presencia de les muyeres en dambes, y pa ello, preparáronse unos conteníos que pensamos resultarán mui atractivos pa la xente”, esplica Elena González, responsable del Área de la Muyer del Partido Popular (PP) de Xixón, que tolos años entama una xornada temática. “Nesta ocasión quisimos tratar dalgo tan cercano y valoratible como ye la nuestra cultura”, añade. Pilar Fernández Pardo, presidenta del PP xixonés, va abrir la xornada a les 11 hores pa llueu dar pasu a Alberto Álvarez Peña, que va facer una ‘Introducción a la etnografía asturiana’. Darréu, va proyeutase’l documental ‘Rincones secretos: Mitología de Asturias’.
 
A les 12.45 hores, Ana María Cano, presidenta de l’Academia de la Llingua Asturiana, y l’académicu y direutor de la Universidá Asturiana de Branu (UABRA), Xosé Antón González Riaño, van dar una charra baxo’l títulu ‘Trés décades d’estudiu, promoción y defensa del patrimoniu llingüísticu’ col oxetivu d’esplicar el llabor de la entidá académica nesti tiempu y les actividaes que se desendolquen nel eventu que tien llugar en Cangas del Narcea n’agostu. Yá pela tarde, a les 17 hores, va proyeutase’l documental ‘A bruxa de Brañavara’, a lo que va siguir una charra del xestor cultural Humberto Gonzali que va servir de ‘Introducción al doblaxe cinematográficu en llingua asturiana’. Amás, los presentes van poder ver una ‘Esbilla de cinema n’asturianu’ de 20 minutos de duración qu’inclúi delles escenes de doblaxes. Pa zarrar la xornada, a les 18.30 hores, la poetisa y narradora Aurora García Rivas va averar a los presentes la lliteratura asturiana en femenín cola intervención ‘Muyeres escritores n’asturianu y gallego-asturiano’.
 
Sensibilización pa col idioma
 
Dende l’Área de la Muyer del PP xixonés conviden a militantes y al públicu en xeneral a acudir esta xornada dedicada a la cultura y a la lliteratura n’asturianu y gallego-asturiano que, n’opinión de la so responsable, “ta en mui bon momentu, con unes obres de gran calidá, y amás con una gran relevancia de la presencia femenina nesti esperanzador estáu de salú, lo que pudimos comprobar nel PP de Xixón a principios de mayu cuando s'entamó na nuestra sé una llectura de poemes n'homenaxe a los autores del Surdimientu”. Entrugada sobre una mayor sensibilización nes files populares hacia l’idioma, González afirma que “el PP de Xixón amosó, dende cuantayá, un enfotu claru pola dignificación de la llingua, pola so difusión, porque representa una parte esencial de la identidá asturiana”. Nesi sen, apunta que “tenemos manifestao periódicamente'l nuestru apoyu con acciones y propuestes concretes en dellos asuntos que conciernen al conceyu de Xixón”. “Nosotros creemos que'l nuestru idioma autóctonu nun ye de naide en particular porque ye de tolos asturianos, y en bona lóxica valoramos positivamente les midíes que conduzan al so fomentu”, conclúi.
 
Na semeya, un momentu d'un conceyu del Área de la Muyer del PP xixonés.

Contador Estadistiques