López: “Les instituciones son fundamentales pa caltener el patrimoniu y la memoria d’Asturies”

|

El direutor del Muséu del Pueblu d’Asturies, Juaco López, protagonizó la charra mensual de l'Asociación Cultural Ástura, de nome 'La memoria d'Asturies. Patrimoniu ya investigación nel Muséu del Pueblu d'Asturies'. L’historiador y etnólogu considera fundamental el papel de les instituciones pa caltener el nuesu patrimoniu pola fraxilidá del mesmu.

Tres una introducción del convidáu por parte d’Amadéu Benavente, d’Ástura, López esplicó que dende un primer momentu treslladó a los responsables de l’asociación cultural qu’entama esta actividá mensual xunto col Atenéu Obreru de Xixón el so deséu de falar del Muséu del Pueblu d’Asturies na mesma. ¿La razón? “Ye un llugar conocíu por tol mundo, pero en realidá ye como esi vecín que conocemos pero del que nun sabemos nada”, apuntó’l direutor de la instalación museística pa depués añadir que “muncha xente piensa que ta abierto namái mientres la Feria de Muestres”, dalgo que lu llevó a empecipiar recién campañes promocionales nos mupis de la ciudá o nel rastru. López tamién ve necesario esplicar lo qué ye un muséu “porque anguaño ye una pallabra despeutiva y peyorativa. Siéntese muncho dicir ‘n’Asturies hai munchos museos’”. Al respeuto, apuntó que “a pesar de la crisis siguen anunciándose museos nuevos col oxetivu de traer turistes, vendíos como motor económicu, pero nun son motor de nada”.

Tres esta esposición breve sobre los oxetivos de la so charra, López principió a afondar nestos aspeutos. “El Muséu del Pueblu d’Asturies ye un centru onde se conserva patrimoniu cultural que ye testimoniu del pasáu d’Asturies y que nos permite conocelo”, apunta’l direutor del mesmu dende’l 1992, a esceición de la temporada de Gobiernu de Foro nel país, cuando ocupó’l cargu de direutor xeneral de Patrimoniu Cultural y Turismu. Asina, la so función ye “alquirir patrimoniu de forma continua y llueu conservalo, estudialo y difundilo. Tamién educar y entretener, enantes qu’atraer al turista”, añadió. Al respeuto, López apunta que too muséu ha de tener trés espacios bien definíos, esto ye, ún públicu destináu a los visitantes; otru pal trabayu del personal; y l’almacén pa les coleiciones.

El Muséu del Pueblu d’Asturies nació nel 1968 y vivió époques bone y males. L’escaezu por parte de l’Alministración na década de les 80 dexó práuticamente nel abandonu a la institución, dalgo que se principió a iguar nos 90. El Plan Museolóxicu aprobáu nel 1998 col oxetivu de “definir funciones y estructurar espacios”, sirvió pa culminar el trabayu de recuperación de la instalación entamáu dende la llegada de López a la direición nel 1992. Dende’l 1985 depende de la Fundación Municipal d’Educación, Cultura y Universidá Popular de Xixón y caltién el so fin de “conservar, estudiar y difundir la memoria d’Asturies”.

Falta de conocencia

López apuntó cómo’l trabayu que se desendolca na institución estudia esta memoria teniendo en cuenta la distribución de la población asturiana en pueblos, villes y ciudaes, y destacó la importancia de “mostrar la diversidá y los cambios na sociedá”. Nesi sen, recordó que’l patrimoniu etnográficu “ye mui fráxil” y apuntó dalgunos de los problemes qu’atopen nel so llabor, como l’ausencia d’estudios de patrimoniu y antropoloxía cultural y social na Universidá d’Uviéu, lo que llevó en dalgún momentu al Muséu del Pueblu d’Asturies a establecer convenios cola Universidad Complutense de Madrid o delles sociedaes madrilanes pa desarrollar y espublizar investigaciones como ‘Tres estudios antropológicos sobre el occidente de Asturias’, ‘Chinos en Asturias’ o ‘Asturianos en Madrid’.

Darréu, llamentó la falta de conocencia de la población sobre el valor que tien esti patrimoniu, poniendo “los horros del sieglu XVI, les paneres del XVII o les paneres pintaes del XVIII que se caen ún tres otru” como exemplu, por ser dalgo que nun se da nos institutos de Secundaria, y destacó la importancia de “dar continuidá al trabayu” desendolcáu poles instituciones, dalgo no qu’Inglaterra, Francia, Estaos Xuníos y Alemaña son referencia. “Lleven recopilando patrimoniu dende mediaos del sieglu XIX. La Sociedá de Folclór de Londres nació nel 1878 y continúa trabayando”, dalgo que nel Estáu nun se dio pese a los esfuerzos d’Antonio Machado Álvarez nesi tiempo al traviés de la Institución Libre de Enseñanza. “Pocos años depués too desapaeció”, apuntó López, que destacó l’enfotu puestu pol Muséu del Pueblu d’Asturies en dar a conocer les espublizaciones etnográfiques y folclóriques primeres d’Asturies, como’l ‘Folk-lore de Proaza’, investigación del militar, escritor y folclorista madrilanu Eugenio de Olavarría y Huarte baxo’l nomatu ‘L. Giner Arivau’, propuesta por Machado Álvarez.

Esti trabayu diose a conocer nel 1876 y recueye la información dada pola so criada, de 28 años, Rosa Fernández, d’una zona cercana a Proaza, convirtiéndose nel primer estudiu científicu sobre folclor asturianu. La espublización editada pol Muséu del Pueblu d’Asturies que recuperaba esti documentu presentóse nel 2009 en Proaza, actu nel que tuvo presente López. “De toles persones presentes nel actu namái una conocía de la esistencia d’esti estudiu. Ye dalgo que fai pensar”, apuntó.

La coleición

Tres recordar que los museos son instituciones recientes –el primeru qu’hebo n’Asturies ye’l Muséu Maríticu de Lluanco, del 1948–, López pasó a enumerar los tipos de bienes patrimoniales que tien el Muséu del Pueblu d’Asturies na so coleición y la manera d’estudiarlos y clasificarlos. En primer llugar citó los inmuebles, como los horros; los pabellones de preseos, basaos en payares; los chozos; o la casa de llabradores, tomando como referencia la nomada casa mariñana, típica del centru del país, pa lo que se fixeron trés investigaciones diferentes: pa la planta, el modelu de cocina y los bienes inmuebles.

Los oxetos muebles ye otru tipu de patrimoniu qu’acueye la instalación museística. “Tenemos una coleición mui grande. Nun hai grandes coleiciones de nada, pero tenemos un poco de too”, esplicó López, que citó nesta categoría productos testiles o de fierro, gaxapos, cestes o vidros. El patrimoniu inmaterial, del que s’encarga nel Muséu del Pueblu d’Asturies l’Archivu de la Tradición Oral y l’Archivu de Música Tradicional, ye otru de los puntos fuertes de la institución. Por último, tán los documentos escritos, ente los que podemos atopar dende cartes a semeyes, pasando per pegatines, cartelos, honores, etiquetes o grabaos, ente otros. Nesta categoría última tien muncho pesu’l material procedente de los munchos emigrantes que salieron del país, yá que “Asturies, ensin entender la emigración, nun s’entiende”.

Una muestra de gráficos y semeyes sirvió pa poner el ramu a esta charra perinteresante cola que López abrió les puertes de par en par del Muséu del Pueblu d’Asturies a los presentes, un recintu que ye’l llar de tolos asturianos. “Necesitamos l’apoyu de la sociedá; que se sienta identificada col muséu”, señaló’l direutor, que recordó que “les instituciones son fundamentales pa caltener el patrimoniu y la memoria d’Asturies”. Un patrimoniu “fráxil” que ye necesario conservar.

Na semeya, López y Benavente.

Contador Estadistiques