L'Área Cultural de Caxastur entama una maratón científica n’Uviéu

|

Esti xueves, Caxastur entama una maratón científica, xornada de divulgación científica dirixida al públicu xeneral. Ésta lleva’l nome de ‘Asesinatos Matemáticos’ y va principiar a les 17 hores nel Centru Cultural Caxastur San Francisco 4 (Uviéu).
 
Claudi Alsina, Doctor en Matemátiques pela Universitat de Barcelona y Catedráticu de Matemátiques na Universitat Politècnica de Catalunya (UPC), va ser l’encargáu de dirixir esti maratón científicu que tien como oxetivu compartir y discutir los avances últimos en ciencia y teunoloxía y la so aplicación a la sociedá. Pa ello, la xornada divídese en conferencies breves na que los investigadores esponen los avances últimos sobre un tema central y que terminen con un alderique abiertu. Caúna suel tener unos 60 minutos de duración.
 
‘Asesinatos matemáticos hoy’ va ser la charra que protagonice Alsina, especialista n’ecuaciones funcionales, en Gaudí y na visualización de educación matemática. Tres la intervención del direutor de la maratoón científica, va llegar el turnu de los ponentes convidaos. El primer d’ellos ye Enric Trillas, Doctor en Ciencies pela Universitat de Barcelona, vicerrector de la UPC y presidente del Conseyu Superior d’Investigaciones Científiques, que va falar de ‘Errores de argumentación: razonar y calcular’.
 
El siguiente en tomar la pallabra va ser el chilenu Claudio Moraga, inxenieru electrónicu pela Universidad Católica de Valparaíso y Investigador Emérito del European Centre For Soft Computing, en Mieres, que va esplicar a los presentes ‘¿Por qué cometen errores los ordenadores?’, pa finalizar depués la maratón científica Pere Grima cola charra ‘Estadística: errores y omisiones’. Grima ye Doctor Inxenieru Industrial, trabaya como profesor del departamentu d’Estadística y Investigación Operativa de la UPC y el so área d’especialidá ye la estadística industrial y les téuniques pal control y meyora de la calidá. La entrada pa esta xornada ye llibre hasta completar l’aforu.

Contador Estadistiques