L’ALLA reedita correspondencia n’asturianu de Xovellanos

L'ALLA asoleyó esta selmana trés nuevos títulos dientro de la colección de cartafueyos de lliteratura escaecida nos que recupera testos de Marcos del Torniello y tamién testos epistolares n'asturianu que caltuvo a primeros del sieglu XIX l'ilustráu Gaspar Melchor de Xovellanos.

Xosé Luis Campal Fernández ye'l responsables de la cuarta entrega de testos espardíos pela prensa asturiana del gozoniegu Marcos del Torniello qu'atopamos en "poemes recuperaos" (1902-1903), y ye tamién a esti autor al que se-y dedica'l volume "Dellos pomes más" (1906-1907) n'edición iguada por Rafael Rodríguez Valdés y que recupera poemes asoleyaos nel diariu "El Carbayón". Estos dos cartafueyos faen los númberos 86 y 87 de la colección "Cartafueyos de Lliteratura Escaecida" que l'ALLA dedica a la recuperación de testos espardíos d'autores de distinta importancia. Los cartafueyos alleguen al llector y estudiosu al asturianu de xéneros lliterarios d'otres dómines y, sobremanera, al asturianu non lliterariu de tiempos yá pasaos, como ye'l casu del volume númberu 88 de la colección que recueye les comunicaciones epistolares que caltuvieron a primeros del sieglu XIX l'ilustráu asturianu Gaspar Melchor de Xovellanos y los sos collacios Xosé Sampil y Miguel Martínez Marina. Les cartes tan fechaes ente los años 1803 y 1805, años que correspuenden cola reclusión del pensador de Xixón nel castiellu de Bellver (Mallorca) por orde del monarca Carlos IV.