L’activista polos derechos humanos n’Iraq Eman A. Khamas visita Asturies

El Comité de Solidaridá Cola Causa Árabe d'Asturies presenta mañana n'Asturies a Eman A. Khamas, Periodista y Escritora iraquina que va falar sobre la situación de los derechos humanos n'Iraq dende la ocupación militar inglesa y americana.

Eman A. Khamas foi Directora del Observatoriu sobre la Ocupación de Bagdad y ye portavoz de l'Asociación "Voluntá de la Muyer" amás d'autora de la obra "Cróniques d'Iraq" siendo una de les figures referenciales del movimientu asociativu iraquín d'oposición a la ocupación militar del país. Llicenciada en lliteratura pola Universidá de Bagdad, esta periodista y traductora que recibió amenaces de muerte pol so llabor al favor de los derechos humanos, lleva alantre un llabor abegosu y peligrosu de documentación de los efectos de la invasión y ocupación del so país polos EEUU y el Reinu Xuníu, desplazándose a zones de combate zarraes a medios de comunicación internacionales y siendo por ello testigu d'escepción del sufrimientu de la población civil.

El programa de les actividaes que va desarrollar n'Asturies esti xueves 27 entama a les 13 hores con una conferencia nel Edificiu Históricu de la Universidá d'Uviéu sobre les violaciones de los Derechos Humanos n'Iraq que va presentar la Decana de la Facultá de Ciencies Concha Masa, mientres qu'a les 8 de la tarde va participar nel debate "Iraq: derechos humanos y resistencia" que va tener llugar en Club Prensa Asturiana d'Uviéu (C/Calvo Sotelo) xunta Paz de Andrés, Caderalga de Derechu Internacional y Ángel Alonso, del Comité de Solidaridá Cola Causa Árabe.