L’Academia de la Llingua recupera la obra de Casimiro Cienfuegos

L'Academia de la Llingua Asturiana, dientro de la so colección "Cartafueyos de lliteratura escaecida" dedicada a la recuperación de testos espardíos d'autores de distinta importancia, asoleyó estos díes la obra "Rimas en Astur-Leonés" que ye l'estoyu poéticu de la obra Casimiro Cienfuegos y Rico que s'escribiere n'asturianu allá pel añu 1928. Escritor, periodista y críticu lliterariu, esti autor gastó munchu tratu col asturianu Fernán Coronas, el famosu "padre Galo" al que conoció teniendo Casimiro Cienfuegos el cargu de cronista oficial de L.luarca.

El poeta valdesán foi quien afaló Casimiro Cienfuegos a escribir en llingua asturiana, un llabor del que salieron los poemes que s'inxerten agora nesti volume, ente ellos Villamourus , Flor del valle , Lus pinares sullozantes , Rosinas del cielu o El corazón del Robléu . La influyencia de Fernán Coronas nel autor yera tan grande que los poemes tan escritos acordies colos criterios ortográficos del Padre Galo, qu'al paecer revisó personalmente los testos enantes de dalos a imprenta.