L’Academia de la Llingua entama un cursu d'adultos en Siero

L'Academia de la Llingua Asturiana va poner un cursín d'asturianu na Pola Siero dientro del so programa d'alfabetización d'adultos. El cursu, de 36 hores de duración, va entamar el 20 de marzu y va dase nel local de l'agrupación política Izquierda Xunida de Siero, entidá collaboradora cola iniciativa y que ta asitiáu na Plaza Les Campes.

Acordies cola matriculación que se rexistre en cursu, va poder escoyese ente un doble horariu de llunes y miércoles de 17 a 19 hores o de martes y xueves de 19 a 21 hores. Nieves Otero, que ta llevando alantre otros cursos del programa de formación d'adultos de l'ALLA, va ser la encargada de poner esti cursu, pal que la matrícula cuesta venti euros. Dientro d'esti programa qu'echó a andar yá nel añu 2004, l'ALLA lleva impartíos cursos, que rexistren unos índices d'aceptación y matrícula bien curiosos, n'otres parroquies de Siero y tamién nos conceyos d'Uviéu y Sariegu.