Kontseilua acude a Xixón pa presentar un 'Protocolu pa la Garantía de los Drechos Llingüísticos'

La plataforma vasca pal desarrollu plenu del eusquera lidera la redaición d'un documentu que pretende marcar la reivindicación de los idiomes europeos amenazaos nes décades próximes. Iniciativa pol Asturianu, entidá representante del nuesu dominiu llingüísticu nel proyeutu, entama un actu'l sábadu en Xixón.

Paul Bilbao Sarria, de Kontseilua y European Language Equality Network (ELEN), organización de la que tamién forma parte Iniciativa pol Asturianu, va esplicar cómo va funcionar el 'Protocolu pa la Garantía de los Drechos Llingüísticos', amás del procesu de la so ellaboración. Precisamente l'actu de Xixón ta encuadráu na rolda de contautos que ta entamando'l coleutivu vascu pa conocer les propuestes dende la esperiencia de delles entidaes interesaes en participar nel procesu.

Nel casu del asturianu y de tol dominiu llingüísticu, Iniciativa pol Asturianu ye la organización encargada de coordinar esti aspeutu. El coleutivu presidíu por Inaciu Galán convidó a entidaes y empreses con sensibilidá pa cola normalización del asturianu pal actu del sábadu, que va desendolcase de 10.30 a 14 hores nel salón d'actos de la xixonesa Biblioteca Pública Xovellanos, y llama a aquelles organizaciones interesaes en participar nel procesu a acudir a esta cita tamién abierta al públicu xeneral. Sicasí, encamienta a confirmar asistencia nel corréu electrónicu info@iniciativapolasturianu.org pa una meyor organización del eventu.

Donostia 2016

Esta iniciativa naz de la idea de redautar un documentu européu "que va tener en cuenta les propuestes d'entidaes de tol continente y que va marcar la reivindicación llingüística de los idiomes amenazaos d’Europa nes próximes décades" con motivu del ventenu aniversariu de la Declaración Universal de los Derechos Llingüísticos y de la capitalidá europea de la cultura de Donostia nesti 2016. Asina, Kontseilua pretende aprovechar esta cita pa convertir a la ciudá vasca nun referente na defensa de los derechos llingüísticos.

Según apunten dende Iniciativa pol Asturianu, nel actu de Xixón "podrán aportase yá propuestes dende la esperiencia de cada entidá, o faelo más alantre dempués de conocer el funcionamientu del Protocolu". Enantes d'Asturies, los representantes de Kontseilua acudieron a toles capitales vasques, Éire, Cymru, Noruega y Frisia, ente otros puntos, pa presentar el proyeutu, con una bona receptividá en tolos llugares.

Na semeya, actu celebráu en Belfast en marzu pa presentar el proyeutu a los axentes sociales irlandeses.