Kepa Junkera, artista convidáu del XVII Festival Intercéltico d’Occidente

Esti miércoles principia en Tapia’l XVII Festival Intercéltico d’Occidente (FIDO). Van ser cinco díes d’actividaes na villa con presencia d’agrupaciones bretones y irlandeses, y col vascu Kepa Junkera, que va actuar el domingu, como artista convidáu.

“Esti añu va a ser una fiesta, yá que tres cuatro años peleando algamamos la recompensa de ser ‘Fiesta de Interés Turístico Regional’. Esti añu queremos facelo lo meyor posible y que se vea qu’esti ye un proyeutu que xenera riqueza a Tapia y atrae a munches persones”, señaló’l direutor del certame, Martín Fernández Cascudo, nel actu de presentación, nel que tuvo acompañáu pol alcalde, Enrique Fernández, y pola conceyala de Cultura, Dulce Martínez. Fenández Cascudo destacó como eventos principales la recuperada ‘A Noite Máxica’, que va tener llugar el sábadu a les 23.30 hores na playa del Murallón y na que van participar les bandes de gaites que van animar les cais de Tapia mientres el FIDO, esto ye, Marino Tapiega, Villa de Mieres, Vilariño de Conso (Galicia) y Kevrenn Kastell (Breizh), xunto col grupu de teatru Aires Costumbristas d’A Caridá, que representará ‘A Melodía Máxica’ de Sara López, y la presencia del vascu Kepa Junkera, artista convidáu pola organización y al que dedica esta edición col oxetivu d’abrise a tol arcu atlánticu. El de Bilbo va xubir al escenariu del Murallón el domingu a les 23.30 hores nun conciertu conxuntu colos irlandeses Sophie Lavoie & Fiachra O’Regal, y tamién va ufrir una ‘master class’ el sábadu.

Otros artistes que van participar nel FIDO, eventu entamáu pola Banda de Gaitas Occidente, son El Koku La Manzana, Kérkennai (Galicia) y Rubén Alba. El certame tamién caltién les actividaes yá tradicionales venceyaes cola mar, como la ‘Arribada del mundo celta’ del xueves, esti añu n’horariu nuecherniegu, cola llegada de les formaciones participantes en barcu; l’homenaxe a los marineros del vienres pela mañana nel mirador d’Os Cañóis; y el desfile de la ‘Alborada del mar’ del domingu. El Mercáu Celta y la Escuela Internacional de Música Folk, na que van participar David Varela, Gautier Moréac, Meven Yhuel, Alba o Junkera, son otres de les actividaes principales del Intercélticu del occidente del país.

L’izáu de la bandera celta

La inauguración del FIDO va tener llugar mañana, a les 19 hores, col izáu de la bandera celta frente a la Casa Conceyu, actu a la que va siguir l’apertura del Mercáu Celta. L’alcalde Fernández, arguyosu de que’l certame algamara’l títulu de Fiesta d’Interés Turísticu por ser dalgo “mui importante pa la promoción del Occidente y, en particular, pa Tapia”, va presidir esti eventu xunto con la conceyala de Cultura. “La propuesta d’esti  añu ye un lluxu, ufriendo un cartelu mui importante de cultura musical y actividaes diverses que nos faen suañar a toos”, afirmó’l primer edil na presentación del FIDO.

Pela so parte, Martínez comprometió’l respaldu municipal pa que’l festival pueda alcanzar, como mínimo, les bodes d’oru gozando “de tan bona salú”. “Ye un arguyu pa Tapia y los tapiegos contar con un festival de les carauterístiques del FIDO, como tamién col equipu humanu que lu fai posible”, añadió.