Junts vota nel Congresu contra la Llei d'Amnistía

La proposición torna a la Comisión de Xusticia y la formación conservadora catalana y el PSOE tendrán un mes pa llegar a un alcuerdu.

Esta tarde celebróse nel Congresu'l Plenu nel que s'aldericó y votó'l dictame a la Proposición de Llei Orgánica d'Amnistía pa la Normalización Institucional, Política y Social en Catalunya, asina como les enmiendes que caltuvieron Junts, ERC, EAJ-PNV y PP, anque los populares terminaríen por retirales. Los 7 diputaos de Junts votaron en contra al nun salir alantre les de so, non pautaes, polo que'l testu presentáu polos socialistes refugóse por 179 a 171, oponiéndose al mesmu tamién PP, VOX y UPN.

Míriam Nogueras, vocera de Junts, argumentó la posición del so partíu apuntando que la Llei d'Amnistía tenía "furacos prietos" y amosó la so disposición a siguir negociando. El PSOE contaba con un alcuerdu d'última hora que nun llegó y nun cedió énte les demandes de los conservadores catalanes de que s'incluyera na norma tou tipu de delitos que se pudieren cometer nel marcu del 'procés català'.