Junqueras recibe una pena pol procés de 13 años por sedición y malversación

La sentencia del Tribunal Supremu condena a prisión al restu de líderes por ente 9 y 12.

Esta mañana diose a conocer el veredictu, refungándose finalmente'l cargu de rebelión, que pidía la Fiscalía, al entender que la violencia nun yera parte estructural del plan. La pena mayor impuesta pol altu tribunal ye pa Oriol Junqueras (ERC), vicepresidente de Catalunya nel momentu de la consulta sobre la independencia entamada pola Generalitat el 1 d'ochobre del 2017.

Los conseyeros Raül Romeva (ERC), Jordi Turull (CDC) y Dolors Bassa (ERC), tamién por sedición y malversación, reciben una condena de 12 años. Por sedición, mentes, van siguir en prisión la presindenta del Parlament Carme Forcadell (ERC), con una pena de 11 años y 6 meses; Joaquim Forn (CDC) y Josep Rull (CDC), de 10; y a Jordi Sánchez y Jordi Cuixart, líderes de les entidaes cíviques independentistes, de 9.

Por desobediencia, queden inhabilitaos por 1 añu y 8 meses Santiago Vila, Meritxell Borrás y Carles Mundó. Otra manera, esta sentencia reactiva la euroorden pa la detención del entós presidente Carles Puigdemont, que coló a Bélxica pa evitar la detención.

Protestes en Catalunya y Asturies

Son numberoses nestos momentos les protestes en toda Catalunya, que tán provocando cortes de carreteres y anulaciones de vuelos nel aeropuertu d'El Prat. N'Uviéu ta convocada una concentración pa esta tarde a les 19.30 hores na Escandalera, n'Uviéu, por parte d'Asturies pol Derechu a Decidir baxo'l lema 'Escontra les sentencies, solidaridá popular. Pola democracia y la llibertá'.