Jones pide a los asturianos "el mesmu rixu que los vuesos antepasaos"

El periodista y escritor inglés tuvo presente nun actu de Xuníos Podemos en Xixón. Esti martes va tar na ciudá Alberto Garzón.

Owen Jones comenzó la so intervención con un 'Puxa Asturies' y pidió'l votu pa la coalición Xuníos Podemos. “Si'l domingo ruxís pola xusticia, esi ruxíu sentiráse per toda Europa”, afirmó.

Tuvo tamién pallabres pal 'Brexit', apuntando que "nun se trata de si dexamos o non la Xunión Europea, sinón sobre cuánto podemos culpar a los migrantes y los refuguxaos”, yá que “los problemes nun los causaron ellos, sinón los políticos qu'agora los culpen de lo qu'ellos causaron”. Pa finar, Owen Jones pidió a los asistentes qu'amuesen “el mesmu rixu que los vuesos antepasaos, como fixeron los mineros enfrentándose a los poderosos”, yá que “la manera de camudar les coses nun ye esperando la so caridá, sinón organizándonos y pidiendo-yos cuentes”.  

Nel actu, que tuvo llugar na Plaza'l Marqués baxo'l nome de 'Los nuevos desafíos de la Europa del cambio. El Brexit y la Troika', tamién intervino Segundo González, númberu dos de la llista de Xuníos Podemos al Congresu, que señaló que “la única esperanza que tien Europa ye España, pa poder valtar al PP y poner en marcha polítiques de progresu que faigan recuperar la confianza na Xunión Europea”, aseguró. El voceru d'Esteriores de Podemos na llexislatura anterior, Pablo Bustinduy, y la diputada na Xunta Xeneral Lorena Gil completaron el llistáu d'intervinientes.

Garzón, na Plaza Mayor

Esti martes ta en Xixón faciendo campaña Alberto Garzón, coordinador estatal d'Izquierda Xunida y númberu 5 de Xuníos Podemos al Congresu por Madrid. Mientres tol día va tener una axenda aprietada, tando convocáu l'actu central a les 18 hores na Plaza Mayor. Xunto a Garzón van intervenir nél Sofía Castañón, númberu 1 de la llista al Congresu por Asturies, el númberu 3 Manuel González Orviz y el diputáu Gaspar Llamazares, amás d'otros representantes de Podemos, EQUO y Xixón Sí Puede.