John Mc Sherry, mayestru de la gaita irlandesa, actúa güei en Mieres

John Mc Sherry, ún de los nomes más importantes nel mundu de la gaita actua güei vienres 24 n'Asturies. Concretamente, va facelo nel Centru Cultural Caxastur de Mieres a les 20:00 hores. Xunta elli va tar la so formación "At First Light Band", grupu de nomaos músicos qu'aseguren un bon resultáu nel escenariu. Nella va tar el músicu asturianu Rubén Bada, que tamién ye ún de los artistes collaboradores del últimu discu de McSherry.

John McSherry (Belfast 1970) ye un verdaderu virtuosu de la gaita irlandesa o "uilleann pipe", que recibió yá dende bien mozu premios poles sos habilidaes musicales. Dempués d'entamar en solitario, Mc Sherry probó con delles formaciones de grupos, ente los que llama l'atención nel añu 1996 la creación d'una banda llamada "Tamalin", mítica na música folk irlandesa cola que dio conciertos n'Europa y USA, ello aparte del so pasu per otra formación de gran trescendencia na música irlandesa como ye Lúnasa. Otramiente, Mc Sherry tien trabayao con otros nomes perimportantes de la música folk y tamién d'estilos mui estremaos del folk, casos de Clannad, Sinnead O'Connor, Rod Steward o Sharon Shannon, ente otros, una versatilidá que nun ha abultar rara nun músicu que pol so estilu y capacidá d'improvisación hebo dellos críticos que lu compararon col mesmu John Coltrane

Pa llegar güei a Asturies, John nun fai'l viaxe musical solu, acompañándose d'un nómina de músicos de primer nivel. Asina na "Al First Light Band" que vien con elli alcuéntrense Donald O'Connor (vigulín y teclaos), fíu del famosu vigulineru Gerry O'Connor, mientres que na gaita irlandesa, wishtle y Bodhran ta Francis McIllduff. Allan Burke ocúpase de la guitarra y la voz, completando'l grupu l'asturianu Rubén Bada. Esti asturianu, que foi miembru de grupos como N'Arba, Corquiéu o Xéliba, ye actualmente una de les trés pates de DRD, y forma parte de la banda qu'acompaña a John Mc Sherry tocando la guitarra y el bouzouky. La esperiencia de Bada con Mc Sherry vien yá de tiempu, y ello ye que l'asturianu yá grabó acompañando a Mc Sherry nel últimu discu del gaiteru irlandés, nel que s'alcuentren delles pieces asturianes como la Muñeira d'Antón.

L'actuación de Mieres va ser de les que "queden pa la posteridá" y ye que'l grupu va aprovechar esti conciertu de güei vienres pa grabar l'actuación con vistes a facer un discu en directo d'equí a poco, xuntando grabaciones en directo a lo llargo de la xira qu'agora tan faciendo