Jiménez diz que condenar los fechos de L’Ayún ye “especular”

La ministra d'Asuntos Esteriores y de Cooperación, Trinidad Jiménez, negóse una vez más a condenar l'actuación marroquí nel ataque al campamentu sah.arianu de L’Ayún. Argumentó qu’hasta nun disponer de “datos confirmaos” sería “especular”.

Na sesión de control al Gobiernu nel Senáu, Jiménez respondió a cuatro preguntes de representantes del PP, PNV, IU y el Grupu Mistu sobre los fechos asocedíos la selmana pasada nes proximidaes de L’Ayún, que dexaron un númberu indetermináu de muertos (diez policíes marroquinos y dos civiles sah.arianos, según Rabat, y 36 muertos según testigos citaos pol Frente Polisariu).
  
D'acordies con Jiménez, el Gobiernu español nun pue, como tampoco ficieron otros Executivos, instituciones o organismos internacionales, dir más allá d'espresar la so "fonda preocupación" polos socesos y pidir una investigación de lo asocedío porque "los fechos tienen consecuencies pero los pronunciamientos sin datos tamién lo tienen".
  
“Responsabilidá histórica”
La ministra reconoció qu'España tien una "responsabilidá histórica" col Sáh.ara, pero precisó que Naciones Uníes nun considera a esti país como una parte nes negociaciones que promueve ente Marruecos y el Frente Polisariu, que cuenten sicasí cola participación d'Arxelia y Mauritania.