Jesús Iglesias ve lluces y solombres nel estatutu catalán

El coordinador xeneral d'IX d'Asturies, Jesús Iglesias, apostó por que les negociaciones pa la reforma l'Estatutu asturianu, dientro del modelu d'Estáu que se plantea col debate sobre'l catalán, "aumente'l nivel competencial y de gobiernu pa que nun aumente la distancia con otres rexones".

Iglesias fexo estes declaraciones nuna rueda de prensa na qu'analizó'l proyectu estatutariu catalán y les sos repercusiones sobre'l restu les autonomíes, sobre too l'asturiana. "Dende Asturies debemos ser capaces de ver los riesgos específicos que se tán xestando cola propuesta l''Estatut'. Pal líder de la coalición d'izquierdes, l'aumentu competencial que se propón na reforma estatutaria catalana ha concueyar col del restu les comunidaes autónomes, sobremanera n'Asturies, porque si non "la distancia qu'hai anguaño, que yá ye grande, va ser tovía mayor" lo que va llevar a que vayamos venos con "un modelu d'Estáu más desigual, más asimétricu, nel que los asturianos vamos tar en piores condiciones pa defender aquellos planteamientos políticos que dende la nuestra rexón queramos tresllada-y al conxuntu'l país", argumentó.

Por ello, instó a los políticos asturianos "a nun quedar a veles vinir al respective a qué modelu de confederación d'Estáu sal d'esti debate". Añedió que si a la final el resultante d'esta revisión del modelu d'Estáu "ye más inxustu y dexa a Asturies nuna situación d'inferioridá, la culpa va ser de los asturianos y non de los catalanes". "Hai qu'aprovechar estos meses de debate l''Estatut' nel Parlamentu español, que va durar aprosimadamente hasta'l branu, pa dir articulando propuestes ente les fuerces polítiques asturianes pa intentar avanzar na busca de consensu y consiguir que'l modelu resultante nel Estáu nun sía lesivu y nun nos sitúe nuna posición de subordinación con otres rexones", argumentó.

En rellación a la propuesta del nuevu modelu estatutariu en Cataluña, Iglesias afirmó que solo se ta falando de les coses negatives del "Estatut", y non de les positives. Nesti sentíu, sorrayó qu'"hai que reconocé-y al "Estatut" un compromisu social y una busca d'avanzar nuna sociedá más xusta, en materia d'educación, sanidá y derechos sociales". Per otra parte, indicó que la propuesta catalana introduz una interpretación al traviés d'un modelu federal del Estáu que "va más allá" de lo qu'hasta'l momentu s'alcanzó col desarrollu del artículu octavu de la Constitución. En rellación a los aspectos que podríen propiciar "riesgos" al modelu d'Estáu y de la solidaridá ente autonomíes, Iglesias destacó la importancia de la redacción que se-yos dea a los aspectos que faen referencia a la Seguridá Social, afitando l'apueste por que'l modelu final "garantice" la caxa única, que "satisfaiga" les necesidaes y prestaciones de los ciudadanos vivan onde vivan y que nun haiga "nenguna quiebra" na xestión del sistema públicu de Seguridá Social.

Sobre'l sistema de financiación, Iglesias apostó por que les negociaciones se faigan ente'l conxuntu de les comunidaes autónomes col Estáu, pa que depués s'apauten rellaciones billaterales ente cada autonomía y el Gobiernu central. Pa Iglesias, en cuenta de "mecanismu de solidaridá" ye preciso falar de "cohexón ente autonomíes"
"Que los catalanes se llamen como quieran, pero que nun sían más que los asturianos", afirmó finalmente'l coordinador d'IX.