Jesús Iglesias diz que ye preciso plantear el debate de la refundación d’IX

El coordinador xeneral d'Izquierda Xunida d'Asturies, Jesús Iglesias, declaró ayeri que la so organización tien de participar nuna reflexón xeneral sobre la refundación del proyectu federal d'Izquierda Xunida, coincidiendo coles opiniones nesti sentíu del coordinador xeneral d'IX Gaspar Llamazares y de l'alcaldesa de Córdoba Rosa Aguilar, que vieron preciso refundar el proyectu d'IX dempués de la perda de pesu de la formación tres de les últimes elecciones autonómiques y a conceyos.

Jesús Iglesias sorrayó que l'estáu va camín d'una dinámica bipartidista y reconoció que la refundación d'Izquierda Xunida ye dalgo "de lo que se fala dende va tiempu y a lo que va haber que siguir dando vueltes". D'otra manera, tocante a los resultaos electorales, Iglesias esplicó que na reunión de la Executiva de la coalición valorárons en términos positivos los resultaos de la formación n'Asturies en cuantres que la presencia na Xunta Xeneral refuérzase al perder un escañu'l PSOE mientres que nel ámbitu de los conceyos pue llegase a les seis alcaldíes. Con too y con ello, Iglesias reconoció'l dañu que fexo la baxada en númberu de votos, que rellacionó cola "bipolarización de la política" y cola crisis interna de la organización.