Jesús Iglesias diz nuna carta a los votantes que nun pue haber un Estatutu que nun reconoza la oficialidá de la Llingua

La coalición IX-BA-LV va unviar una carta pidiendo'l votu a los ciudadanos na que la formación política preséntase énte los ciudadanos como un apueste por una Asturies más social, con más autogobiernu y más sostenible y como una propuesta "d'izquierda, asturianista y ecoloxista".

La carta propón una política industrial "tradicional y innovadora", un modelu de desarrollu sostenible y non especulativu y defende los llogros de la coalición nos sos cuatro años de presencia en gobiernu, ente ellos la instauración del salariu social o la construcción de 18.000 viviendes con dalgún tipu de protección" mientres que fai promesa de garantizar los derechos sociales, la educación, la sanidá, la vivienda y les prestaciones sociales "como conquistes irrenunciables". La carta afonda igualmente nes reivindicaciones de la formación con vistes a la reforma del estatutu d'autonomía, nel que "nun pue haber un Estatutu que nun reconoza la oficialidá de la Llingua" nel que los ciudadanos nun sientan imposición y nel que l'alministración tea obligada a conocer l'asturianu.