Jesús Iglesias alvierte qu’Asturies ta llexitimada pa ser nacionalidá histórica

El representante d'IX-BA-LV nel parlamentu asturianu, Jesús Iglesias, aseguró ayeri nel turnu de réplica al discursu inaugural del Presidente Areces nel Debate d'Orientación Política de la Xunta xeneral del Principáu que la so agrupación va reivindicar el so papel na Xunta Xeneral del Principáu, porque "nun-y lo va conceder graciosamente'l Grupu Socialista, sinón porque ye frutu de la voluntá de los electores".


Iglesias, que foi l'encargáu de entamar la sesión del Debate d'Orientación Política, aseguró que lo que presentó Areces foi "un informe burocráticu de xestión, defendiendo la capacidá del so equipu y la so vocación de serviciu públicu", un discursu que bien pue "responder a un Alministrador y non a un presidente d'Asturies".

Iglesias detúvose nel so discursu no tocante a la reforma del Estatutu d'Autonomía, de la qu'alvirtió que la so agrupación va tener como principal oxetivu que la mesma "respuenda a la realidá social d'Asturies y a les preocupaciones de los sos ciudadanos".

"Nós pensamos que pocos territorios tán tan llexitimaos como Asturies pa reivindicar el so carácter de nacionalidá o comunidá histórica", dixo Iglesias, qu'indicó que la so fuerza política "nun va cayer na trampa de facilitar que'l debate estatutariu se centre en cuestiones que los asturianos puedan ver alloñaes de la so vida cotidiana". Iglesias insistio en que'l nuevu Estatu va tener d'ampliar el conxuntu de derechos civiles y sociales de los asturianos, porque lo que se pretende ye qu'esta comunidá "nun seya menos qu'otres" y que nun s'asitie nuna "posición subalterna".