Jesús Iglesias esixe que l’estatutu asturianu nun sía “la fotocopia d’otros”

El Coordinador Xeneral d'Izquierda Xunida d'Asturies, Jesús Iglesias adelantó ayeri nuna rueda de prensa parte de los conteníos que se van tocar nel próximu Conseyu Políticu de la coalición, nel que se va aprobar la propuesta d'IX pa la reforma de nuevu Estatutu d'Autonomía.

Iglesias definio la propuesta d'IX como un documentu p'atacar y iguar "los problemes reales d'Asturies" y afitó la idea de que la so fuerza política va mirar por que l'Estatutu d'Asturies nun sía "la fotocopia d'otros Estatutos" al empar que llamentó que "por desgracia, otres Comunidaes Autónomes van bastante más rápido qu'Asturies na ellaboración de los sos Estatutos d'Autonomía", en referencia a los Estatutos de la Comunidá Valenciana, Cataluña, Baleares o Andalucía. El casu andaluz, onde PSOE y IX apautaron la reforma estatutaria, apaeció pela intervención d'Iglesias, que lu calificó como "una esperiencia positiva". El dirixente d'IX esplicó que'l futuru Estatutu d'Asturies ha aspirar al "máximu nivel d'autogobiernu" independientemente del términu col que se denomine a Asturies, precisando que "Si ye preciso que se llame comunidá histórica o realidá histórica que se llame, non porque nos preste'l nome sinón porque ello pue resultar imprescindible pa consiguir el máximu nivel d'autogobiernu".

En cualquier casu, y n'acabando'l debate internu d'ellaboración de la propuesta, el portavoz d'IX esplicó que la formación plantégase abrir un debate social nel que se constate y contraste la so propuesta con organizaciones sindicales, empresariales y moces y col movimientu asturianista, too ello col oxetivu de "llograr involucrar na ellaboración del Estatutu d'Autonomía a l'Asturies social, viva y estructurada qu'hai a pesar de qu'otros lo nieguen" en referencia a diferentes voces que dende otres opciones polítiques que planteguen la idea de que n'Asturies nun ye prioridá la ellaboración Estatutaria. Iglesias foi mui críticu nesti sentíu col PP asturianu al qu'acusó de "bloquiar esta reforma estatutaria prescindiendo d'Asturies y de los asturianos, "por una obediencia debida a una estratexa estatal que nun val p'Andalucía como se va ver a curtiu plazu, que nun val, como yá se vio pal País Vascu, que nun val en Baleares, nin en Castiella Lleón, onde'l PP ta impulsando la reforma Estatutaria y que nun val tampoco pa Galicia, onde tamién se ta comprometiendo'l PP na Reforma del Estatutu".