Jesús Iglesias defende la oficialidá na reforma del estatutu

El Coordinador d'Izquierda Xunida alvirtió nuna entrevista que-y concedió al diariu "La Nueva España" que de nun dase la oficialidá na próxima reforma estatutaria l'asturianu va convertise nuna "llingua muerta".

Nuna entrevista centrada nos problemes internos de la coalición d'izquierdes que lidera Iglesias y les sos rocees colos sos socios de gobiernu de la FSA-PSOE, Iglesias reconoz que la cuestión del asturianu va ser "incomprensiblemente" un tema d'alderique col PSOE. Iglesias define la llucha pola oficialidá nesta reforma estatutaria p'Asturies como "la última batalla pal asturianu" y afirma que si l'estatutu nun espeya la cooficialidá del asturianu, "en mui pocu tiempu vamos tar falando d'una llingua muerta". El Coordinador d'Izquierda Xunida camienta que la refuga del PSOE a la oficialidá nun pue venir d'otro más q ue de "de prexuicios y pantasmes" anque tamién afirma que d'un tiempu pa contra acá'l debate sobre l'asturianu ta más aposentáu y yá se dieron pasos pa la so normalización incluso na Xunta Xeneral. El dirixente políticu diz que ta dimpuestu a discutir "Los plazos y el mou d'oficialidá".