Jesús Fernández algamó’l trunfu na modalidá de sable nel Villa de Xixón d’esgrima en siella ruedes

|

Esti fin de selmana pasáu celebróse en Xixón la primer prueba puntuable pal Campeonatu Estatal d’Esgrima en Siella Ruedes, na que l’ayerán Jesús Fernández llevóse’l trunfu en sable. El valencianu Fernando Granell ganó en florete y espada.
 
L’Hotel Tryp ‘Rey Pelayo’ de Xixón acoyó la competición na que participaron los asturianos Jesús Fernández y Alejandro Rodríguez y tiradores procedentes de la Comunitat Valenciana, Euskadi y Andalucía. El deportista del conceyu d’Ayer llegó a les tres finales de la competición, anque namái pudo llevase la de sable, onde ye especialista, tres derrotar a Rodríguez por 15-8.
 
En florete, l’asturianu viose superáu por Fernando Granell, que se llevó’l trunfu por 15-9, mentes que’l valencianu tamién pudo imponese na final d’espada, nesta ocasión por 15-6. Toles armes disputáronse con un mesmu formatu de competición: una ‘poule’ previa que daba accesu a semifinales. El Villa de Xixón, que vivió la so sesta edición, ye una competición organizada pola Federación de Deportes de Minusválidos Físicos d’Asturies (FEDEMA) y el Club Armas Gijón.

Contador Estadistiques