Jerónimo Granda, nos actos del 1 de mayu del Fusoa

El cantautor Jerónimo Granda va ser la gran estrella de la fiesta alternativa del Primeru de Mayu, qu'organiza'l Fondu Unitariu de Solidaridá Obrera d'Asturies (FUSOA). La celebración va facese nel auditoriu del Cerru de Santa Catalina en Xixón n'acabando la manifestación qu'entamen na ciudá les centrales CGT y CSI y el sindicatu d'enseñanza Suatea, y la organización del actu diz que toles perres que se recauden van dir pa financiar los gastos que xeneren los conflictos llaborales n'Asturies.

Amás de la presencia de Jerónimo Granda, el programa incluye música folk y una sesión de monólogos asturianos a cargu d'Antonio Caamaño, alma de la compañía teatral "Nun Tris". N'acabando'l teatru va haber tiempu tamién pal grupu de Ska La Tarrancha y pal conxuntu Escuela de Odio, que presenten el discu "De la esclavitud a las cenizas". Les actividaes complementaries incluyen la celebración d'un mercáu solidariu con puestos de delles organizaciones sociales d'Asturies y una xinta popular.