Javier Fernández preside la xestora del PSOE tres la dimisión de Sánchez

El secretariu xeneral decidió abandonar el cargu tres nun algamar l'apoyu del Comité Federal a la so propuesta de primaries.

Tres una llarguísima xornada que comenzó pela mañana, pasaes les 20 hores votóse a mano alzada la fueya de ruta defendida por Pedro Sánchez, que contó col apoyu de 107 delegaos, por 132 que la refugaron. Esta situación llevó al líder socialista a dimitir, obligando a la convocatoria d'una xestora permanente pa dirixir el PSOE hasta la celebración d'un Congresu.

Tal como s'esperaba, esta xestora va tar dirixida por Javier Fernández, secretariu xeneral de la FSA, tres la votación del Comité Federal. Los diez miembros de la mesma aconceyaron esta mañana en Madrid per primer vegada y el presidente d'Asturies atendió a los medios tres la reunión.

Nella señaló que "la peor de les soluciones ye evidentemente dir a eleiciones", ensin esclariar si'l PSOE va astense pa dar la presidencia del Gobiernu estatal al popular Mariano Rajoy. Esta decisión va tomala'l Comité Federal que, segun confirmó Fernández, nun va convocase pa esti sábadu.