Javier Fernández diz que van ser los asturianos "los que decidan" nes urnes sobre la oficialidá

El presidente del país apunta que los partíos llevarán con claridá nos sos programes la so postura respeuto a la proteición del idioma.

Javier Fernández respondió a una entruga respeuto al desarrollu de la Llei d'Usu y Promoción del Bable/Asturianu de Nicanor García Fernández, voceru de Ciudadanos –que volvió a repetir na so intervención un supuestu costu de la oficialidá de 50 millones, mui lloñe de les cifres que manexen dellos espertos y l'Academia de la Llingua Asturiana– señalando que "creo que la cuestión clave ye qué quieren facer los homes y muyeres n'Asturies cola so llingua: quieren que siga asina o quieren que sía cooficial... Eso van decidilo nes eleiciones próximes, porque imaxino que cada partíu llevará con claridá nel so programa qué piensa facer cola llingua, si efeutivamente quieren cooficializala o non. Y ehí van ser los asturianos los que decidan".

El socialista confirmóse una vegada más na so postura persona, contraria a la del so partíu anguaño, "que nun llevaba nel so programa y por eso nun se va aplicar agora". "El momentu será nes eleiciones próximes si la suma de los partíos que quieren la cooficialidá llega o non al porcentaxe necesariu pa poder plantegar una reforma del Estatu que la contemple", añadió.

Sobre la entruga en sí, '¿Considera vusté que'l so Gobiernu desarrolló toles posibilidaes de fomentu, proteición y promoción que contempla la Llei d'Usu y Promoción del Bable/Asturianu?', Fernández apuntó que "el Gobiernu tomó decisiones en rellaición col desarrollu d'esa llei", citando'l plan pilotu pa facer vehicular la llingua asturiana en Primaria, pa depués añadir que "intentamos ensin ésitu hasta agora crear la especialidá docente. Seguramente esa llei tien más posibilidaes pa promover y pa protexer la llingua asturiana, pero, en fin, nun sé qué ye realmente lo que vusté quier plantegar", respondió al voceru de Ciudadanos.

Semeya obra d'Armando Álvarez.