Javier Fernández considera'l fortalecimientu de la industria "el nuesu desafíu principal"

El discursu institucional caberu de Javier Fernández como presidente d’Asturies señaló’l fortalecimientu del corazón industrial como’l mayor desafíu que tien per delantre’l país. “Reconversión industrial, evolución demográfica y financiación autonómica son los trés escenarios nos qu’Asturies xuega’l so futuru”, aseguró.

Un recuerdu a los asturianos nel esterior y a los trabayadores d’Alcoa y los más de 70.000 paraos foron los primeros mensaxes que Fernández treslladó na so intervención, que centró sobre manera na industria y nel caltenimientu del emplegu. “Ensin anclaxe industrial, un modelu económicu ye siempre más fráxil. Basar la recuperación esclusivamente nel turismu, la construcción, los servicios precarios y la demanda interna fadríanos mui febles. Pretendemos una industria cada día más moderna, más flexible, con más componente teunolóxicu, con más capacidá d’arrastre sobre otros sectores y también más llimpia. Y pa ello, ni nos encadenamos al pasáu nin nos resistimos a unos cambios qu’han de producise necesariamente. Sólo pidimos dos coses: que nun se permita que les actividaes productives se desllocalicen hacia los países nos que contaminar resulta más barato y que la necesaria tresformación s’articule xestionando de manera afayadiza’l mediu llargu plazu”, afirmó.

Tamién tuvo pallabres pa la crisis demográfica, destacando’l fechu de que’Asturies en xunión con otres comunidaes autónomes consiguió asitiar esta problemática na axenda política estatal, y na financiación autonómica, apuntando que “la evolución del modelu d’Estáu pue depender más d’un cambiu nel sistema de financiación que d’una reforma constitucional” y defendiendo “un sistema cooperativu y solidariu que permita un mesmu nivel de servicios públicos independientemente del llugar de residencia”. Darréu tornó a citar l’importante pesu de la industria na economía del país y reflexonó que “cola transición enerxética nin ye necesario dir más allá de lo que demanda Europa nin lo ye anticipase con midíes con un costu que pueda ser inasumible pal nuesu texíu productivu”.

Pa finar, llamó a toles fuercies polítiques pa que s’aprovechen los meses últimos de llexislatura “na defensa de los intereses de la nuesa tierra” y que se pueda “trabayar hasta l’últimu minutu por una Asturies meyor” dexando atrás los intereses eleutorales particulares. Tamién a la sociedá pa desaniciar la violencia sobre la muyer, “pa lo que queda entovía un trechu enorme por percorrer”, apuntó.