Javier Fernández considera que "nun ye'l momentu afayadizu" pa reformar l'estatutu

Ramón Argüelles llamentó la falta de compromisu del presidente pa col procesu p'algamar la oficialidá tres el so discursu nel Alderique d'Orientación Política Xeneral.

"¿Ye posible despachar agora un cambiu del Estatutu? Con tol respetu a la llibertá de decisión de la Cámara, creo que non, que nun ye'l momentu afayadizu p'atizar esi debate. Reformar un Estatutu ye una tarea seria que requier más ingredientes que'l simple oportunismu", apuntó Javier Fernández na so intervención. Foi na parte final d'un discursu nel que tamién destacó l'enfotu del so Gobiernu en camudar l'opinión d'Alcoa sobre'l zarru de la so planta n'Avilés y nel que treslladó la so disposición a algamar un alcuerdu presupuestariu con Podemos.

Nesti pautu tamién entraría Izquierda Xunida (IX), que s'amuesa favoratible al diálogu. El so coordinador xeneral sicasí criticó la falta de soluciones daes por Fernández n'infraestructures y política industrial, y llamentó la so postura no que respeuta a la reforma del Estatutu que pretende poner en marcha la coalición y Podemos.

"Ye una pena que'l presidente nun quiera reconocer, nin siquier nun xestu de despidida, que n'Asturies hai una llingua, que ye l'asturianu, que queremos que nel so momentu sía llingua oficial", apuntó Argüelles. "Prestaríanos qu'hubiese'l máximu consensu pa poder aprobalu y, si nun pue ser nesta llexislatura, como bien el secretariu nuevu de la Federación Socialista Asturiana (FSA) prometió, que pueda ser na siguiente", añadió darréu.

El miércoles, segunda sesión

A les 9 hores de mañana va comenzar la segunda sesión del Alderique d'Orientación Política Xeneral. Nella los grupos de la oposición van tener la pallabra, con posibilidá de réplica pal presidente Fernández.