Javier Fernández celebra la presencia de la familia real pa conmemorar el triple centenariu de Cuadonga

|
Entrega medayes d'Asturies 2018

“A tola familia real, la nuesa bienvenía y el nuesu agradecimientu”. Asina finó’l presidente del país, Javier Fernández, la so intervención nel actu d’entrega de les medayes d’Asturies nel Auditoriu d’Uviéu, na que los descubridores de les pintures paleolítiques d'El Pozu’l Ramu y los centros asturianos centenarios recibieron la d’oru.

El socialista señaló que “con 1.300 años d’historia, arguyosos de formar parte de l’Asturies de güei, celebremos como merez la nuesa fiesta autonómica. La presencia de los reis, de la princesa Leonor y de la infanta Sofía nos actos del triple centenariu de Cuadonga constata la trescendencia histórica d’esta conmemoración. Son la xefatura del Estáu y la Corona les que demuestren cuála ye la relevancia d’esta efeméride, de los 13 sieglos del orixe del Reinu d’Asturies”. Foi tres empoderar el llabor de los gallardonaos y apuntar que “debemos tar arguyuosos de ser una comunidá autónoma que nun s’astrae, sinón que se siente parte activa d’un Estáu democrático onde’l llugar de nacencia nun otorga derechos especiales”, amás de pola “nuesa vocación europeísta, del compromisu con un proyeutu construyíu sobre la democracia, la xusticia social y la disolución de les fronteres”.

Darréu llamó a reinvidicar “l’Asturies tan abierta como segura de la so identidá, que siempre tuvo a la vanguardia na modernización d’España y Europa”. Y pa ello, afaló a los presentes a fixase “nos meyores”, en referencia a los gallardonaos.

Siete medayes

Esti añu cúmplense cincuenta años del afayu de les pintures rupestres del Paleolíticu d’El Pozu’l Ramu –espaciu que se bautizó col nome d'un de los sos descubridores, Tito Bustillo, que morrió selmanes depués nun accidente de montaña–, a cargu de Ruperto Álvarez Romero, Eloisa Fernández Bustillo, Jesús Manuel Fernández Malvárez, Pilar González Salas, Adolfo Inda, Amparo Izquierdo, María Pía Posada, Elías Pedro Ramos, Celestino Fernández Bustillo y Fernando López Marcos, éstos dos últimos yá finaos. Toos ellos recibieron la medaya d’oru d’Asturies xunto col Centro Asturiano de México; el Centro Juventud Asturiana de Siero y Noreña en Buenos Aires; l’Asociación Civil Unión y Progreso Social y Recreativa Residentes del Ayuntamiento de Degaña en la República Argentina; les Sociedades, Clubes y Uniones de La Habana; el Centro Asturiano de Buenos Aires; el Centro Asturiano de Mar del Plata; el Centro Asturiano Casa de Asturias del Uruguay; el Centro Asturiano de Santa Fe; el Centro Asturiano de Rosario; el Centro Asturiano de Tampa; y el Centro Asturiano de Madrid, toos ellos con más de cien años de vida.

Mentes, les medayes de plata d’esti añu foron pa l’abogáu Diego Canga, el médicu Jesús María Otero Hernández –a títulu póstumu–, l’Hospital Universitariu de Cabueñes, la Federación de Cofradías de Pescadores del Principado de Asturias y a la Sociedad de Pescadores Las Mestas del Narcea.

Semeya obra d'Armando Álvarez.

Contador Estadistiques