Javier Fernández aconceya cola ministra Maroto aprovechando la so visita a Uviéu

La responsable d'Industria, Comerciu y Turismu acudió a la inauguración del II Congresu Mundial de Destinos Turísticos Intelixentes. Tamién se vio con Adrián Barbón.

María Reyes Maroto pudo sentir de primer mano los esmolecimientos d'Asturies por cuenta de los planes de transición enerxértica del nuevu Gobiernu estatal y el futuru de la industria nacional y de les zones mineres. La ministra tuvo esta mañana n'Uviéu con motivu de la inauguración d'esti congresu qu'acueye'l país con motivu del triple centenariu de Cuadonga y aprovechó la so presencia n'Uviéu p'aconceyar col presidente Javier Fernández; el conseyeru d'Emplegu, Industria y Turismu, Isaac Pola; y el secretariu xeneral de la Federación Socialista Asturiana.

Barbón tresmitió-y la situación industrial del país, mentes que Fernández y Pola afondaron na transición enerxética, demandando qu'ésta sía xusta y razonable, y recordaron-y les consecuencies graves que traería pa les empreses asturianes el zarru precipitáu de les centrales térmiques. En declaraciones a los medios, Maroto nun entró en detalles y namái apuntó que'l so Gobiernu promueve una transición "sostenible" y basada nel diálogu que permita "xenerar oportunidaes".

Na semeya, Maroto, l'alcalde d'Uviéu Francisco Wenceslao López y Fernández.