Javier Fernández diz que la posición de la FSA sobre la oficialidá ye “la que yá conoz tol mundu”

El secretariu Xeneral de la Federación Socialista Asturiana (FSA - PSOE) Javier Fernández fizo ayeri llunes unes valoraciones sobre l'alcuerdu políticu pol que va roblase la reforma del estatutu d'autonomía catalán. Na so valoración sobre l'Estatutu de Cataluña Fernández, que tresmitía la opinión de la FSA tres de la xunta de la so Comisión Executiva, aseguró que "cumple cola Constitución y cola solidaridá ente territorios" abultándo-y que ye "un alcuerdu bonu pa Cataluña y pa España". Anque se declaró esmolecíu colos puntos sobre financiación que van espeyase na carta magna catalana que reconoció que "nun son satisfactorios p'Asturies" Fernández dixo que tampoco cabía facer "posicionamientos apocalípticos" sobre ello y aseguró que la financiación catalana "da-y mayor responsabilidá al Gobiernu catalán" pero "concasa col sistema vixente" y por ello "garantiza la cohexón social y los servicios".

No tocante a la reforma del Estatutu d'Autonomía d'Asturies, Javier Fernández adelantó que nel debate na Xunta Xeneral del Principáu va "buscase'l debate y la sintonía coles demás fuerces parlamentaries" colo qu'abrió la puerta a la negociación col PP qu'hasta agora vien declarándose roceanu cola reforma del estatutu asturianu Javier Fernández dixo nesti sentíu que "nun valíes escuses" y que tolos grupos habíen trabayar la reforma estatutaria asturiana colos oxetivos cimeros de facer un apueste "pol desarrollu económicu y l'equilibriu territorial" nel estatutu. Con emponderalu Fernández refugó que la plantiya del Estatutu catalán valiere p'Asturies.

Entrando yá na negociación del procesu de reforma estatutaria p'Asturies, Fernández aseguró que la FSA ta "contenta" de cómo ta saliendo'l Pautu de Gobiernu con IX-BA pero alvirtió que "nun se puen mecer coses" y qu'ello nun compromete a la FSA na negociación de la reforma del estatutu. Tocántenes al tema de la oficialidá del asturianu Fernández afitó que la postura de la FSA "ye la que yá conoz tol mundu" y pide que se debata "ensin retórica" sobre esti asuntu. El secretariu de la FSA declaró que "hai qu'afalar y potenciar el sentimientu asturianu pero en nengún casu hai que politizalu".