Javier Fernández diz que la FSA "nun va aceptar la obligatoriedá de la llingua"

El secretariu de la Federación Socialista Asturiana (FSA) Javier Fernández declaró a la emisora Radio Nacional d'España que'l so partíu nun va aceptar la oficialidá del asturianu na reforma del estatutu polo qu'ello tendría d'imposición y alvirtió que la reforma del estatutu d'autonomía asturianu nun ha facese dende'l puntu de vista "identitariu" en cuantes que la identidá asturiana "con ser mui marcada, nun s'enfoca a la política". Javier Fernández amestó que la reforma estatutaria pue tar fecha d'equí a la vuelta d'ún añu.

Pal secretariu de los socialistes asturianos la reforma del testu estatutariu nun ye "absolutamente necesaria", anque-y abulte "interesante" facela. En cuantes a los puntos que va tener esa reforma pa la que Fernández alvirtió que ye "imprescindible" contar col sofitu del PP p'algamar los trés quintos de la cámara autonómica, el secretariu de la FSA nun adelantó nengún puntu concretu, falando namás xenéricamente sobre "delles competencies que puen ser interesantes" y a facela pensando en "allegar a los ciudadanos a les instituciones".

En cualquier casu, Javier Fernández sí apautó lo que nun va tener sitiu na reforma de la Llei Orgánica pola que se manda l'autonomía asturiana dende 1981. Na so definición en negativo de la reforma del estatutu asturianu, Fernández dixo qu'esta nun había facese dende "la idea identitaria que tienen n'otros territorios d'España, porque la personalidá d'Asturies ye mui marcada pero nun s'enfoca a lo político".

Otru puntu sobre'l que Fernández alvirtió que la Federación Socialista Asturiana nun ta dimpuesta a negociar foi'l de la oficialidá del asturianu nel Estatutu d'Autonomía. Fernández declaró que "La FSA siempre refugó esta midida" afirmando que "nun vamos a aceptar cláusules d'imposición a los que nun quieran falar la llingua asturiana". Una negativa que pal secretariu de la FSA nun entra en conflictu cola so idea de que la llingua "nun cuerra absolutamente nengún peligru y que tolos falantes puean emplegala".