Jáuregui ve discutible que les CC.AA tengan que tener televisión

El ministru de Presidencia, Ramón Jáuregui, señaló que les comunidaes autónomes "tienen que tener" los sos propios Defensores del Pueblu, pero cree que sí cabría "debatir si tienen que tener una televisión".

Nuna entrevista na Cadena Ser recoyida por Europa Press, Jáuregui sorrayó, sicasí, qu'ési ye un debate que tienen que faer "les mesmes comunidaes". "El Gobiernu central nun pue dici-y a la Comunidá Valenciana que zarre Canal Nou, ésa ye una decisión que tien que tomar Valencia y los sos electores", señaló.
  
Según el ministru de la Presidencia, les comunidaes sí tienen que contar con un Defensor del Pueblu, "lo mesmo que tienen un tribunal de cuentes, un parlamentu, un presupuestu y un gobiernu", un altu nivel de competencies que fai que l'exerciciu autonómicu del poder afecte al "35 o'l 40 por cientu" del PIB español.
  
D'esta manera, pidió al líder del Partíu Popular, Mariano Rajoy, que "diga claramente", de cara a les próximes elecciones autonómiques, si va llendar competencies o suprimir instituciones, porque los ciudadanos "tienen derechu a saber y ellos tienen la obligación d'esclarialo".
  
"Que seya Rajoy, faciendo casu a (l'ex presidente José María) Aznar, quien faiga un programa políticu nes comunidaes autónomes pa dicir que va llendar competencies y suprimir instituciones. Que lo digan claramente, porque tolo demás ye un xuegu floral", repostió.
  
Ello ye que quiso calcar en que la posición del PSOE sobre la necesidá de meyorar el funcionamientu del Estáu autonómicu nun coincide "n'absolutu" cola del PP y en que nun-y paez "xusto" que s'acuse a ambos partíos de tar 'entamando algo' contra la descentralización.

Pactar coles CC.AA
Al so xuiciu, nun hai que "repensar" el modelu sinón "buscar un pactu" coles comunidaes autónomes pa evitar duplicidades ente normes autonómiques que deriven nun mal funcionamientu del mercáu interior, nun momentu en que la situación económica reclama, precisamente, quitar torgues.
  
Asina, insistió en que "la cultura" del PSOE ye la de promover "el pactu federalista" y qu'ello nada tien que ver con que "el PP pretenda suprimir instituciones, llendar competencies, recentralizar y renacionalizar la política".
  
Ello ye que volvió criticar a Aznar por tachar al Estáu autonómicu de "invidable" y "marxinal" y opunxo el so discursu a l'actitú del PSOE, que ye quien fizo "el modelu autonómicu en coalición colos nacionalistes per 25 años" y quien promovió los Estatutos d'autonomía de segunda xeneración.