Izquierda Xunida y los Verdes lleguen a un alcuerdu pa les elecciones de mayu

Izquierda Xunida d'Asturies tien yá aprobáu l'alcuerdu electoral pol que va presentase xunto cola fuerza política "Los Verdes d'Asturies" a les elecciones del próximu mes de mayu. Según el documentu, al que tuvo accesu Asturies.com y que namás ta pendiente d'una asamblea que van celebrar Los Verdes mañana martes, el partíu d'ideoloxía ecoloxista tendría l'octavu puestu acutáu na llista electoral a les autonómiques, xunto con delles places nes llistes a un total de quince conceyos. La llista llamaríase "Izquierda Unida - Los Verdes" y en tol documentu nun se fai mención a la posibilidá de que s'amieste a la mesma un tercer sociu, que sedría'l Bloque por Asturies, anque les negociaciones ente esta fuerza y IX avancen paralelamente al alcuerdu colos Verdes.

Según fontes de Los Verdes, l'aprobación del alcuerdu na asamblea del martes dase prácticamente por fecha, y, anque dende la formación ecoloxista valórase'l resultáu de la negociación como "meyorable" en dellos puntos, la idea xeneral ye que va sirvir pa incidir positivamente nes polítiques ambientales n'Asturies.

La propuesta d'alcuerdu electoral, a la que tuvo accesu Asturies.com, acuta pa Los Verdes el puestu octavu na llista pola circunscripción central y los segundos puestos nes candidatures poles circunscripciones occidental y oriental. L'alcuerdu espeya tamién la creación dientro del Grupu Parlamentariu na Xunta Xeneral de la "Oficina Verde" na que trabayaría una persona nomada por Los Verdes.

No tocante a les candidatures a conceyos, Los Verdes tienen puestu acutáu nes llistes de la coalición nes principales ciudaes asturianes, asegurándose-yos la cuarta plaza na llista por Xixón, la tercera n'Uviéu y la sexta n'Avilés. N'otros conceyos como Siero y Llanera Los Verdes tendríen el tercer puestu acutáu, siempre ún per detrás del actual númberu de conceyales actuales d'IX-BA. Los Verdes encabezaríen les candidatures a los conceyos de Salas y Villaviciosa, conceyos onde IX nun tien anguaño representación. Como teóricos "puestos de salida" l'alcuerdu ufiérta-yos a Los Verdes el primer puestu en Cuideiru, onde IX-BA llograre un conceyal nel 2003 y el cuartu puestu en Mieres, onde IX-BA tien anguaño seis conceyales. El mesmu casu asocedería nel casu de Llanera, onde la coalición d'izquierdes llogró cuatro representantes nel 2003 y onde Los Verdes tendríen acutada la tercer plaza na llista .

En casu de que la coalición llegue a responsabilidaes de gobiernu n'alministración asturiana, l'alcuerdu especifica que persones designaes por Los Verdes d'Asturies ocuparíen a lo menos una Dirección Xeneral por caúna de les Conseyeríes que xestionare la coalición. Casu de llograr más d'una Conseyería, una de les Direcciones xenerales podría sustituyise por una secretaría xeneral técnica o órganu equivalente. Una de les direcciones xenerales propuestes nel alcuerdu sedría la de "Educación Ambiental, Sostenibilidá y Cambéu Climáticu" encargada de facer estratexes de desarrollu sostenible, planificación d'espacios naturales, midíes pal tresporte y movilidá sostenible y programes Axenda 21. Otra de les Direcciones xenerales podría ser la d'Agricultura Ecolóxica y Programes de Desarrollu Rural. Les direcciones xenerales de Salú Pública y Consumu Responsable y la de Participación Ciudadana son les otres posibilidaes conseñaes nel documentu.

Otramiente, en casu de llegase a responsabilidaes de Gobiernu en conceyos, el conceyal de Los Verdes, asumiría tamién responsabilidaes rellacionaes col mediu ambiente, mientres que la fuerza ecoloxista tendría representación n'otros organismos, entes, conseyos o empreses públiques.