Izquierda Xunida píde-yos a los conceyos del Navia-Eo que firmen pola so asturianidá

Izquierda Xunida va proponé-yos a los conceyos del Navia-Eo que proclamen l'asturianía "incuestionable" de la zona per aciu de resoluciones de les corporaciones municipales siguiendo la plantiya de la declaración que s'aprobó la selmana pasada na Xunta Xeneral del Principáu por unanimidá ente los trés grupos parlamentarios y que se plantegó como una declaración de principios contra la propuesta del Bloque Nacionalista Gallegu (BNG) de reforma del estatutu d'autonomía pa Galicia, na que se dexa la puerta abierta a la entrada en Galicia de conceyos asturianos.

El mesmu coordinador xeneral d'Izquierda Xunida d'Asturies Jesús Iglesias acudió en persona a la presentación d'esta iniciativa en conceyu de Navia, onde rellacionó la propuesta presentada pol so grupu políticu cola idea de reforma del estatutu gallegu cola que trabaya'l BNG pero tamién con otros asuntos como la candidatura conxunta gallego-portuguesa énte la UNESCO qu'incluyía conceyos asturianos como parte del ámbitu d'espardimientu de la cultura gallega. Fuera del terrén cultural, Iglesias pidió-y un marcu de respetu a Asturies por parte de la comunidá vecina y denunció otres iniciatives gallegues que baxo gobiernos anteriores dañaron los intereses d'Asturies, casu del trazáu l'Autovía del Cantábricu, les obres na Ría del Eo y la política sobre cuota llechera.