La izquierda soberanista convoca una manifestación pal Día de la Nación Asturiana

|

Tres la bona esperiencia de la participación conxunta en delles protestes en defensa de la llingua y los derechos sociales, la izquierda soberanista convoca una manifestación per Uviéu y delles actividaes pal 8 de setiembre. El Día d’Asturies oficial va celebrase en Candás, mentes qu'IX tien previstu un actu en Rusecu.

La iniciativa #LluchandoPolaSoberanía, entamada al rodiu del Espaciu La Llegra, prepara una xornada reivindicativa pa esti día que va tener na manifestación el so actu central. Ésta va salir a les 12.30 hores del Paséu de los Álamos d’Uviéu baxo’l lema ‘Pa tresformar Asturies’ y va finar na plaza’l Paragües, onde ta prevista una xinta popular y actividaes a lo llargo de la tarde, como xuegos tradicionales, cuentacuentos y actuaciones musicales. D’esta forma, preténdese dar un formatu diferente a les reivindicaciones por mor del Día de la Nación Asturiana –organizaes al traviés d’asamblees abiertes nel que participaron organizaciones y persones a títulu individual de la izquierda soberanista–, dando-y protagonismu a los movimientos sociales al traviés de cuatro exes: mocedá y educación, llaboral y derechos sociales, xéneru y llibertaes sexuales, y ecoloxismu y mundu rural.

La programación completa pa’l 8 de setiembre va dase a conocer esti xueves, a les 11.30 hores, nun actu abiertu nel Conceyu Abiertu del Llar Solidariu. Hai que destacar qu’esta iniciativa toma’l relevu de la esitosa manifestación xunitaria del añu pasáu en Xixón convocada, baxo’l lema de ‘Asturies decide: pola soberanía y el cambiu social’, por Compromisu por Asturies, Conceyu Abiertu, Andecha Astur y Izquierda Anticapitalista, que contó col sofitu de la Corriente Sindical d’Izquierda (CSI), Darréu, el Centru Social Autoxestionáu La Semiente, la Xunta Estudiantil Asturiana y el Sindicatu Unitariu y Autónomu de Trabayadores de la Enseñanza d’Asturies (SUATEA). Nestos momentos sofiten la iniciativa de La Llegra les organizaciones Compromisu por Asturies, Conceyu Abiertu, Iniciativa Comunista d’Asturies y Darréu, y ta previsto un conceyu nuevu’l miércoles cola intención de sumar más apoyos a la convocatoria.

IX celebra un actu en Sobrescobiu nel que participa Cayo Lara

Víctor Suárez, coordinador de la estaya ‘Faciendo país’ d’Izquierda Xunida (IX), va presentar l’actu qu’entama la coalición por motivu del Día d’Asturies. Ésti va tener llugar nel Centru Cultural Vicente Álvarez (El Pedrusu, Rusecu) a partir de les 13 hores, y va contar cola participación del coordinador federal, Cayo Lara; del coordinador xeneral, Manuel González Orviz; y del coordinador municipal, Ovidio Zapico. La organización pon autocares dende Avilés, Xixón, Uviéu, Mieres y Llangréu, siendo necesario inscribise enantes –viaxe y xinta– nos teléfonos 682.091.967 y 985.73.82.56.

Otra manera, Carreño releva a Villaviciosa como sede de la celebración del Día d’Asturies qu’entama’l Gobiernu. Esta tarde, a les 19 hores, ta prevista la presentación de la programación oficial del eventu nel Centru Polivalente La Baragaña de Candás.

Contador Estadistiques