Izquierda Asturiana y Andecha Astur anuncien un principiu d’alcuerdu pa les elecciones a conceyos

Germán Abad, secretariu d'organización d'Andecha Astur y Faustino Zapico, secretariu xeneral d'Izquierda Asturiana (IAS) dieron güei anuncia de que les dos formaciones polítiques nacionalistes llegaron a un principiu d'alcuerdu pa presentase conxuntamente a les elecciones a conceyos del próximu mes de mayu. Los responsables de dambes formaciones sorrayen que "l'alcuerdu ye mui positivu porque favorez y espeya de forma práctica la unión de la izquierda nacionalista y evita la duplicidá de candidatures y la competencia ente llistes con programes mui asemeyaos que van presentar propuestes en clave asturiana,verde y non clientelar".

Pa Zapico y Abad "la converxencia de eas fuerces nacionalistes d'izquierda n'Asturies" demandábala un sector de la población que s'alcuentra güérfanu d'una propuesta diferente de facer política que se base na concepción d'Asturies como un país dueñu del so futuru, y de la defensa insobornable del so mediu ambiente y cultura".

Otramanera, dambes formaciones valoraron negativamente les propuestes polítiques coles que van competir nes elecciones, entamando por un Partíu Popular allancáu na derecha neolliberal más tradicional y que "nun pue ser garantía d'un gobiernu" mientres que per otru llau "afítase'l pautu anunciáu ente PSOE-IU-BA-LV" que les formaciones d'izquierda nacionalista consideren como "el segundu actu d'una comedia na se embauca a los electores con propuestes de izquierdes que s'escaecen o aparquen en cuantes se llega al gobiernu".


Según el comunicáu de prensa conxuntu en que se da a conocer l'alcuerdu, nesti inxérense delles fórmules adaptaes a les característiques de cada conceyu y a la implantación de caúna de les dos formaciones nos mesmos y se alcuéntrase abiertu a la entrada d'otros colectivos colos que se tá conversando".


Anque nun s'adelanten pel momentu más detalles sobre les candidatures que van presentase nin los térmninos concretos del alcuerdu, que se comprometen a dar a conocer "nun plazu de tiempu lo más curtiu posible" los representantes de les dos fuerces de la izquierda nacionalista aseguren que "les conversaciones prosiguen a bon ritmu y el clima ye mui positivu gracies a la voluntá qu'existe poles dos partes pa llegar a un alcuerdu".