Izquierda Asturiana denuncia'l "apartheid" del RIDEA

La organización nacionalista Izquierda Asturiana (IAS) emitió una nota na que se solidariza con Yolanda Magdalena, a la que'l Real Institutu d'Estudios Asturianos nun-y almitió una ponencia por tar escrita n'asturianu, denunciando lo que-y abulta una política de "apartheid" por parte de la institución y una "discriminación intolerable".

El portavoz de la formación d'izquierda asturianista, Ignaciu Llope recordó qu'existen casos asemeyaos de discriminación, citando'l que sufrió Faustino Zapico, miembru de la dirección d'IAS y al que la Universidá d'Uviéu-y refugó la matriculación de la so tesis doctoral por llevar el títulu n'asturianu. Llope emponderó "la decisión valiente y exemplar de Xosé Lluis Campal por retirar la so comunicación nel mesmu congresu como protesta énte un fechu intolerable"

El portavoz d'IAS declaró que "esta ye otra preba de qu'ensin oficialidá la supuesta defensa y promoción del asturianu ye papel moyao, y que'l pautu de Gobiernu y el Plan de Normalización son una ironía tristaya y sangrina pa les persones que namás pretenden facer usu de los sos derechos" anque tamién dixo que s'enfotaba en que "la razón que nos asiste" lleve a que "se supere la discriminación y l'apartheid que sufre la cultura asturiana nesta España de ZP, la del talante y los derechos"