Izquierda Asturiana concede’l primer Premiu 25 de Mayu a la Coordinadora Ecoloxista d’Asturies

Izquierda Asturiana va celebrar durante
la próxima selmana dellos actos conmemorativos del aniversariu del 25 de mayu
de 1808, ente los que destaca la primer edición del Premiu 25 de Mayu, que
nesta ocasión concédese a la Coordinadora Ecoloxista d’Asturies.

Esti premiu que va tener carácter
anual quier “reconocer la trayectoria de persones, asociaciones o entidaes que
rescamplen pola so defensa de les llibertaes ciudadanes, la defensa de los
derechos d’Asturies o l’auto-organización ciudadana” según s’esplica nun
comunicáu. La Dirección Nacional d’Izquierda Asturiana decidió que’l galardonáu
del añu 2006 seya la Coordinadora Ecoloxista d’Asturies (CEA) pola so “trayectoria
constante de defensa del mediu ambiente y la so vinculación y apertura a toa
triba de movimientos vecinales, ciudadanos, asociativos, col oxetivu d’algamar
una Asturies ecolóxicamente sustentable”. L’actu d’entrega va facese nun
céntricu local uvieín durante una cena que se va celebrar el próximu vienres 26
de mayu.

Asimesmo’l 24 de mayo Faustino
Zapico, historiador y miembru de la Dirección Nacional d’IAS dará una charra col
títulu “La Revolución de mayu de 1808 (o l'aniciu de la historia contemporánea
d'Asturies)” a les 20.00 hores na Sala Conceyu Abiertu, asitiada na cai La
Gascona 12 Baxu A d’Uviéu.