Ixuxú celebra’l so primer añu de vida con actividaes pel centru d’Asturies

|

El coleutivu Ixuxú Asturies-Euskal Herria elkartea cumple un añu de vida llevando la cultura asturiana a Euskal Herria. Pa celebralo, la organización da un xiru a la so propuesta y avera la cultura vasca a Asturies con delles actividaes.

En realidá, les cinco proyeiciones y el conciertu que propón esta organización dirixida por Xicu Ariza, ex redautor d’Asturies.com, en dellos puntos del centru d’Asturies nun ye otra que la presentación de les sos intenciones pal añu qu’acaba d’arrancar. Asina, Ixuxú va dar un pasu alantre y, al mesmu tiempu que va continuar col llabor de dar a conocer la poco conocida realidá cultural asturiana n’Euskal Herria, va principiar a entamar actos nel nuesu país p’averanos aspeutos culturales y sociales vascos.

Xixón va ser la sede de la primer actividá prevista ente güei y el sábadu. El Centru Social Sestaferia va acoyer esta tarde, a partir de les 20 hores, la proyeición del documental ‘Iñigo Cabacas. Crónica de una herida abierta’, que cuenta la historia de la muerte d’un aficionáu del Athletic Club tres un partíu de Lliga Europa por un pelotazu de la Ertzaintza. Mañana, la xira d’Ixuxú va parar en L’Entregu, nel Centru Social Autoxestionáu La Semiente, onde va proyeutase a la mesma hora’l documental ‘Hala Bedi Irratia. 30 urte kolpez kolpe’, alrodiu de los trenta años de la radio llibre gasteiztarra Hala Bedi.

La película nueva de Fermin Muguruza, ex cantante de Kortatu y Negu Gorriak, ‘No more tour’, sobre la xira última cola so banda actual, va poder vese’l xueves n’Avilés, n’El Cafetón. Mientres, el vienres, El Judá, en La Pola Siero, va acoyer la proyeición del documental ‘Emarock’, sobre la música y la muyer n’Euskal Herria, y una espocisión que la completa –abierta al públicu dende ayeri–. Dambes actividaes van principiar a les 20 hores.

Conciertu en La Madreña

La xornada cabera de la celebración del primer aniversariu d’Ixuxú va concentrase nel Centru Social Okupáu Autoxestionáu La Madreña, n’Uviéu. Pa les 18 hores ta previsto la emisión de ‘Ziztadak-Tábanos’, un documental que muestra distintes iniciatives vasques de desobediencia civil non violenta. Darréu, a les 20.30 hores va principiar el conciertu que va poner el ramu a esta selmana d’actividaes, cola presencia de Skama la Rede como anfitrión, y de les bandes vasques Skakeitan y ON. Les entraes anticipaes van tar a la venta a partir del 27 de xineru por un preciu de 4 euros, el mesmu qu’han d’abonar los socios d’Ixuxú. Mientres, na puerta va xubir un euru más. Los tickets yá tan disponibles n’El Cafetón (Avilés), L’Esperteyu (Uviéu), Chigre Ochobre (L’Entregu), La Escuela (Cangues d’Onís), El Judá (La Pola Siero), Sestaferia y Sidrería Canteli (Xixón).

 

Contador Estadistiques