Ixuxú Asturies-Euskal Herria elkartea entama un alcuentru ente La Semiente y el Gasteizko Gaztetxea

|

L’Entregu y La Felguera prepárense pa celebrar esti sábadu una folixa astur-vasca col oxetivu d’enanchar rellaciones ente coleutivos sociales de los dos países. Un autocar va desplazase dende Gasteiz pa devolver visita a los asturianos.

En marzu, gracies a la intermediación d’Ixuxú Asturies-Euskal Herria elkartea, coleutivu que trabaya na difusión y promoción de la cultura asturiana en territoriu vascu, miembros del  Centru Social Autoxestionáu La Semiente y d’otres asociaciones desplazáronse a Gasteiz pa llevar un cachín d’Asturies al gaztetxe llocal. Charres, sidra y música protagonizaron una xornada que tien continuidá agora nel ‘realcuentru’ previstu pa mañana na cuenca’l Nalón. L’actividá va principiar a les 12.30 hores, tres la llegada de los ‘gaisteiztarras’, con un pasucais turísticu-reivindicativu-folixeru per L’Entregu, pa depués desplazase a La Felguera, en concreto al Parque Vieyu, onde a les 15 hores ta prevista una fabadona popular, al preciu de 5 euros, qu’inclúi arroz con lleche –tamién s’ufre alternativa pa la xente vexetariano–.

Nesi mesmu llugar, a les 17.30 hores, va instalase un mercaín de coleutivos vascos, y, a les 18.30 hores, va celebrase la mesa redonda ‘El movimientu popular d’Euskal Herria, en Gasteiz’. Yá pela nueche, a les 21 hores, va entamase un conciertu de K-Nalón, a lo que va siguir un ‘micro abiertu’, pa finar la folixa nel chigre Ochobre de L’Entregu bien entrada la madrugada.

Xira de presentaciones de ‘La Chelita. El Salvador 1992’

Ruma Barbero, gracies a la collaboración d’Ixuxú Asturies-Euskal Herria elkartea, coleutivu del que ye responsable Xicu Ariza, ex redautor d’Asturies.com, ta de xira per Euskal Herria presentando la so novela gráfica ‘La Chelita. El Salvador 1992’, primer obra del músicu y dibuxante que se torna al castellanu. Asina, tres visitar Bilbo, Gasteiz, Iruña y Donosti, güei va tar presente n’Atarrabia, pa depués siguir dando a conocer el llibru en Lizarra y Arrasate. Hai que destacar que’l trabayu de Barbero ta teniendo una repercusión grande nos medios de comunicación vascos, con reportaxes y entrevistes. En munches d’elles, la situación de la llingua asturiana ye ún de los temes que sal a alderique.

Pal mes d’ochobre, Ixuxú tien zarraes dos actuaciones de Skama la Rede, n’Erandio (día 11) y Gasteiz (12), continuando asina cola promoción n’Euskal Herria de la cultura asturiana, entovía mui desconocida fuera de les nueses llendes.

Contador Estadistiques