IX y PP refuguen la propuesta del Gobiernu d’entrega de factures simbóliques a los usuarios del sistema sanitariu

“Ye una midida de tresperencia nidia de lo que cuesta’l sistema sanitariu”, defende’l conseyeru Francisco del Busto en referencia a la propuesta d’entrega de factures simbóliques a los usuarios. Nin Izquierda Xunida (IX) nin el PP sofiten esta iniciativa.

Mientres una visita esta mañana a les obres centru de salú Mieres Norte, el conseyeru de Sanidá aseguró que “el dueñu absolutu del sistema sanitariu ye’l ciudadanu y la tresperencia ha de ser máxima pa col ciudadanu. Por eso la información de cómo s’utilicen los recursos nel sistema sanitariu debe ser una norma, y ente elles ta’l costu de los recursos humanos y económicos”. Asina, defendió la propuesta d’entregar factures simbóliques a los usuarios, lo que considera “non una midida coercitiva, sinón una midida de tresperencia nidia de lo que cuesta’l sistema sanitariu.

“La Sanidá evidentemente nun tien preciu; hai qu’utilizar los máximos recursos posibles nos ciudadanos. Pero tien un costu, y lo mesmo que cualquier trabayador del sistema sanitariu sabe lo que cuesta un procesu porque lo ta viviendo día a día, el ciudadanu tamién tien derechu de saber lo que cuesta”, añadió Del Busto.

Oposición a la iniciativa

La propuesta, que yá se punxo en marcha n’otros territorios como Andalucía o la Comunitat Valenciana col oxetivu de concienciar a la ciudadanía del gastu que conlleva cualquier consulta o prueba pa promover un usu racional del sistema de salú, recibió la oposición d’IX y el PP.  La coalición, que va pidir la comparecencia del conseyeru y del xerente del Sespa, José Ramón Riera, entiende qu’esta midida nun ye adecuada pa un sistema públicu y considérala amás inoportuna nesti momentu epidémicu pol gripe.

“El Serviciu de Salú de Principáu d’Asturies convirtióse nun espertu en cortines de fumu. Nel momento en que ye evidente l’error na xestión de personal na epidemia del gripe, llanza la llebre de la factura sombra pa eludir la so responsabilidá y, lo que ye peor, pa treslladala a los pacientes”, criticó’l so voceru na Xunta Xeneral, Gaspar Llamazares.

El PP, pela so parte, cree que la iniciativa da la factura simulada ye “un globu sonda” pa preparar a los asturianos “pal copagu sanitario, porque ye lo que paez. Deberíen esplicalo”, reclamó’l voceru popular en materia de Sanidá, Carlos Suárez. “Echen en cara al PP que’l so deséu ye la privatización de la Sanidá pública y resulta qu’agora pretenden inducir a los pacientes a non utilizar esti serviciu públicu con factures informatives, un sistema al que los socialistes opunxéronse a glayíos”, añadió.

Na semeya, Del Busto escucha a Aníbal Vázquez, alcalde de Mieres, mientres la visita a les obres del centru de salú Mieres Norte.