IX Xornaes de la llingua y la cultura asturiana

Cerca de 2.000 escolinos de 12 escueles de Xixón participen nes IX Xornaes de la llingua y la cultura asturiana, que faen los profesores d'asturianu de la ciudá en collaboración cola Fundación Municipal de Cultura y la Oficina Municipal de la Llingua. Les xornes entamen güei y van desarrollase a lo llargo de tola selmana qu'entra

Estes xornaes, que se celebren tolos años coincidiendo cola Selmana de les Lletres, incluyen, xunta les actividaes tradicionales como talleres sobre fabricación de paxos y productos tradicionales, otres nueves como ye'l casu d'un taller de radio y otru sobre Internet. Son en total más de 40 actividaes dedicaos a María Teresa González, desapaecía en 1995 y pa la que la conceyala d'educación Carmen Rúa tuvo pallabres d'alcordanza.

Aparte d'estes xornaes empobinaes pa los rapacinos y rapacines del conceyu, la programación cultural xeneral de Xixón nesti mes de mayu tamién va tener munchu espaciu acutáu pa la cultura asturiana. Asina, la Fundación Municipal de Cultura, Educación y Universidá Popular, organiza a lo llargo del mes de mayu una riestra d´actividaes nos Centros Municipales, empobinaes a promocionar la cultura asturiana. Eventos de tou tipu: lliterarios, musicales, teatrales, etc que tienen como oxetivu incluyir na ufierta cultural de la Fundación, la cultura y llingua asturianes.

El Programa de Cultura Asturiana desendólcase durante tol añu pero ye en mayu, cola celebración del Día de les Lletres Asturianes, cuando concentra la mayor parte d´actividaes, con numberosos conciertos del programa "L´Asturianada en Centros Municipales", actuaciones de Teatru costumbrista y monólogos, Teatru infantil, Música folk, proyección de curtios de cine n'asturianu y presentaciones de llibros