IX va defender los derechos del colectivu homosexual na reforma del Estatutu

Una delegación de l'asociación de defensa de los derechos de los homosexuales, llesbianes y tresexuales XEGA encabeada por Tino Brugos aconceyó ayeri col Coordinador Xeneral d'Izquierda Xunida Jesús Iglesias y col Secretariu de Política Municipal d'IX Alberto Tirador.

Nuna nota de prensa unviada dempués del alcuentru, IX esplica que va defender que na reforma del Estatutu d'Autonomía se reconozan los derechos de gais, llesbianes y tresexuales, faciendo mención espresa a la prevención d'actitúes contraries a estos colectivos y l'inxerimientu nel estatutu del reconocimientu a los estremaos modelos de families existentes.

El Coordinador Xeneral d'Izquierda Xunida adelantó tamién que nel programa electoral d'IX va inclutise la entrada en serviciu d'una Oficina pa homosexuales, Llesbianes, Tresexuales y Bisexuales (GLTB). Esta oficina dependería directamente de la Vicepresidencia del Gobiernu y tendría por oxetivu garantizar la tresversalidá de les polítiques empobinaes a estos colectivos. Xunto con esta oficina, y en collaboración con Educación, crearíase un programa de llucha contra la homofobia nos centros educativos.

El coordinador de XEGA, Tino Brugos, aprovechó la reunión pa esixir la creación d'una Unidá de Tratamientu de Tresxuales que se comprometiere a echar a andar la Conseyería de Sanidá, dotada d'un sicólogu, un siquiatra y un endocrinu. Brugos pidió tamién la xeneralización a tolos centros educativos del Plan Afectivu - Sexual, que funciona como esperiencia pilotu en delles escueles y el reconocimientu específicu a estos colectivos nos programes d'inserción llaboral.