IX tamién va llevar el problema del IBI pa los horros a la Xunta Xeneral

Va defender una proposición de llei nel Plenu d'esta selmana pa protexer esti patrimoniu.

Gaspar Llamazares, voceru d'Izquierda Xunida (IX), aseguró esta mañana tres la Xunta de Voceros que'l pagu del Impuestu de Bienes Inmuebles (IBI) por horros, paneres y cabazos ye dalgo qu'alarmó "a dalgunos ciudadanos de dalgunos conceyos", lo que llevó al so grupu a presentar una proposición de llei pa "protexer los horros d'esa política, que creíemos yá protexíos pola propia Llei de Patrimoniu, pero que consideramos que ye una llei que tien necesidá de concretase entovía más". D'esta forma la coalición posiciónase nun asuntu nel que venía dellos meses trabayando Podemos, llevando l'asuntu al Congresu, y que pon en peligru esti patrimoniu etonográficu asturianu.

Otra manera, Llamazares tamién fixo referencia al 'Pautu poles Infraestructures', amosando'l so esmolecimientu pol fechu de que “conforme pasa'l tiempu aumenta la estensión del documentu y disminúi la intensidá del compromisu políticu de les fuercies parllamentaries”. Al so xuiciu los grupos deberíen ser quien a establecer prioridaes: “Sería una pena que por aumentar el númberu d'obres y apuntanos a la última ocurrencia, finalmente sía una carta a los Reis Magos nin siquier roblada por tolos neños".