IX refuga’l proyectu de presupuestos y amenaza cola enmienda a la totalidá

El coordinador d'IX d'Asturies, Jesús Iglesias, refugó'l proyectu de presupuestos del Gobiernu asturianu asegurando que nun tien "carácter social" y almitió la posibilidá de presentar una enmienda a la totalidá si nun se modifica'l procesu de tramitación parlamentariu de les cuentes.

Ente los aspectos que criticó Jesús Iglesias ta la "conxelación" del salariu social ha en 18 millones d'euros y el que pa la Llei d'Atención de la Dependencia namás s'acuten 7 millones d'euros cuando, al paecer d'IX, son precisos a lo menos 14.

La situación de la vivienda, na que s'asegura que "nun se cumple'l plan vixente" y nun hai "previsión nenguna d'ayuda al pagu de les hipoteques" tamién figura ente les crítiques d'IX, que llamenta, al empar, que xuba nun 30 % el presupuestu que s'acuta pal pafu d'asesores personales del presidente Vicente Álvarez Areces y los 15 millones d'euros que van dir pal "chiringu" de la Universidá Llaboral. Iglesias valoró'l proyectu de cuentes, que diz que va siguir analizando más en fondura, como un claru xiru a la derecha.