IX quier abrir víes pa una “oficialidá ensin imposición” na reforma del estatutu d’autonomía

Izquierda Xunida d'Asturies quier que la reforma del estatutu d'Autonomía d'Asturies espeye la oficialidá del asturianu ensin qu'ello suponga automáticamente "imposición nin obligación" como se defende dende la FSA-PSOE. El Coordinador xeneral d'IX d'Asturies Jesús Iglesias, esplicó güei la manera en que quier llevar alantre esta propuesta.

Jesús Iglesias declaró que'l so partíu "ye consciente de les realidaes d'Asturies respective al asturianu, polo que tenemos voluntá d'alcontrar fórmules pal so reconocimientu nel estatutu que nun lleven arreyada imposición nin obligación". Contra l'argumentu de los sos socios de gobiernu de la FSA, qu'identifiquen oficialidá con imposición Iglesias ye de la idega de qu'hai fórmules llegales que van garantizá-yos a los asturianos el derechu a emplegar y conocer la so llingua ensin qu'ello suponga una obligación".

Pa ello, Iglesias propón que l'asturianu apaeza nel estatutu como llingua oficial pero con una amestadura al artículu onde s'espeye esti reconocimientu na que s'especifique que la oficialidá del asturianu nun lleva arreyada la obligación de conocelu". Una segunda opción sedría la de nun incluyir esa amestadura pero condicionar el desarrollu d'esa oficialidá a la redacción d'una llei pola que tendría de mandase l'exerciciu de la mesma. Iglesias camienta qu'asina reconoceríase'l derechu al emplegu del asturianu y al empar desaniciaríense situaciones como'l que nunes oposiciones puntue'l conocimientu d'otres llingües estranxeres y non el del asturianu.

El coordinador xeneral d'IX fizo un llamáu al PP a dexar el so bloquéu a la reforma estatutaria y emponderó la voluntá del PSOE d'avanzar pa contra un estáu más federal, al empar que reconoció que ye preciso pesllar el procesu de tresferencies que concede l'estatutu d'autonomía actual, con especial atención a la tresferencia de xusticia, que dixo que ta enllamorgada por una diferencia d'ente 3 y 4 millones d'euros ente les cantidaes coles que trabaya l'alministración central y l'asturiana.