IX denuncia que Renfe suprimió 350 servicios no que va de mes

“Esbarrumbe” y “decadencia”. Con estes pallabres califica Izquierda Xunida (IX) la situación del sector ferrioviariu n’Asturies, que, según les cifres que manexa la coalición, rexistra no que va de mes más de 350 servicios suprimíos, cantidá que Renfe rebaxa a menos de 300.

D’ellos, 330 seríen de cercaníes y 20 de media distancia. “A esta situación d'esbarrumbe, de decadencia, sumóse tamién la noticia que conocíamos va dellos díes, de que'l ministru Ávalos decidió retardar les inversiones que veníen yá establecíes nel plan de cercaníes p'Asturies, remitiéndose a la ellaboración d'un Plan Nacional de Cercanías”, apunta Ovidio Zapico.

El diputáu señaló qu'IX yá pidió al Executivu asturianu que faiga pública la so opinión sobre esti cambiu na planificación que “dexa nel escaezu'l plan que p'Asturies ellaborara l'anterior ministru, el señor De la Serna, el ministru viaxeru, aquel que prometía muncho pero cumplía poco; aquel que nos dexó un plan de cercaníes pero ensin creitu pa encaralu”. Tamién entruga-y si considera necesario esixir una actuación d'emerxencia nel anchu métricu, énte'l deterioru aceleráu del serviciu.

 “Dende IX sí consideramos esta actuación d'emerxencia”, añadió Zapico, que cree imprescindible que Javier Fernández esixa a Pedro Sánchez qu'evite'l “esbarrumbe del sistema ferroviariu primero que sía tarde“.

Argumentos de la compañía

Renfe, pela so parte, reduz el númberu de supresiones de serviciu a 288 y señala como’l principal culpable de les mesmes a los bastiazos cayíos esti mes nel país. Asina, cifra nun 96 por cientu los servicios qu’operaron con normalidá.