IX da anuncia de que ruempe la xunidá de votu col PSOE na Xunta Xeneral

L'alcuerdu non esplicitáu qu'IX albidra qu'amagostaron ente PSOE y PP pa nomar procuradora xeneral d'Asturies a la conceyala socialista de Xixón Mª Antonia Fernández Felgueroso y al popular Noel Zapico como axuntu al cargu llevó a Izquierda Xunida a tomar un determín al respective. Asina, la portavoz d'IX na Xunta Xeneral del Principáu Noemí Martín dio ayeri una rueda de prensa pa dar anuncia de que'l pautu ente les dos fuerces mayoritaries pa "repartise" los cargos de procurador xeneral va entamar "una etapa nueva de rellación entre les organizaciones polítiques que tienen pol Gobiernu asturianu, polo que dixo que d'agora en p'alantre "naide tendría d'estrañase" pol resultáu de les próximes votaciones na cámara asturiana, en cuantes qu'IX yá nun va respetar el criteriu de xunidá de votu col PSOE.


Por de pronto, nel plenu del próximu 29 de xunu, en que va tratase l'aprobación d'estos cargos, el grupu parlamentariu d'IX-BA va votar en blanco, en cuantes que nun pue votar en contra, mientres que nun futuru IX-BA acuta pa ella'l derechu a estudiar y apautar otres resoluciones col PP y non col PSOE. Martín aclarió que con ello nun quier dicir qu'IX-BA franciere'l pautu de gobiernu nin que pase a ser una fuerza d'oposición, anque esplicó que'l pautu queda "tocáu" y sorrayó les sos duldes sobre'l perfil d'independencia de los dos candidatos. No tocante a Fernández Felgueroso, el cargu qu'ocupare apocayá como conceyala pue suponé-y que delles intervenciones d'ella como Procuradora Xeneral puean recurrise, mientres que sobre la figura de Noel Zapico, antiguu diputáu en Cortes del réxime franquista y actual presidente del comité de garantíes del PP, la diputada entrugóse si una persona cola so trayectoria política podría ser "de la confianza de Felgueroso".

Va yá dos meses, en sabiéndose del supuestu tratu ente PP y PSOE pa nomar los cargos de la procuradoría xeneral, cargu equivalente al de "Defensor del Pueblu" el secretariu xeneral d'IX d'Asturies Jesús Iglesias declarare que'l nomamientu negociáu col PP de la hermana de l'alcaldesa de Xixón abría "un mecanismu perversu na Xunta Xeneral" albidrando a resultes d'ello un últimu añu de llexislatura "con tensiones mui difíciles"qu'agora tan pa concretase.