IX critica que’l Gobiernu faiga de menos el salariu social mientres la UE pide una renta mínima

Los responsables d'IX d'Asturies criticaron a la Conseyería de Bienestar Social del Principáu que dirixe Pilar Rodríguez, por poner en cuestión el Salariu Social cuando laComisión Europea ta pidiendo "una renta mínima pa tolos europeos". IX recordó nuna nota de prensa les declaraciones feches ayeri mesmo pol comisariu d'Empleu y Asuntos Sociales, Vladimir Spidla, nes que se mostró favorable a establecer na UE una "renta mínima" de la que se beneficiaríen los europeos que nun puean trabayar o nun tengan oportunidá d'alcontrar un empléu porque sedría un instrumentu pa lluchar contra la "probitú estrema".


El Comisariu européu afirmó que "p'aquelles persones que nun puen trabayar o que tienen poques oportunidaes p'alcontrar trabayu, los rexímenes de renta mínima son, dacuando, la única forma pa lluchar contra la probitú estrema".

Pa IX les palabres del comisariu rescamplen énte les declaraciones feches dende la Conseyería de Bienestar Social, que diz que nun tuvo reparu en "cuestionar" públicamente el Salariu Social "que garantiza unos niveles mínimos d'ingresos a tolos asturianos y quiciás l'avance más importante nel sistema asturianu de servicios sociales".