IX constitúi la so Coordinadora y aprueba la llista de componentes de la Comisión Colexada

Dambos órganos repártense al 61 y al 39 por cientu ente les llistes de Zapico y Ponte.

Izquierda Xunida (IX) celebró per videoconferencia na tarde del vienres un aconceyamientu pa constituyir la Coordinadora y aprobar la llista de componentes de la Comisión Colexada, na que participen 45 persones. La Coordinadora confirmó la eleición d'Ovidio Zapico como coordinador xeneral, que ganara les primaries ente la militancia del 26 de setiembre con un 60,8 por cientu de votos a favor, nengún en contra y l'astención del 39,2 por cientu restante, poniendo fin al discutiniu internu tres la impugnación por parte del sector críticu de la cita eleutoral de febreru.

Zapico dio a conocer los nomes de los responsables de les secretaríes que conformen la so direición. N'Organización va tar Maximino García; n'Aición Política, Faustino Sabio; en Municipal, Alberto Tirador; en Finances, Iván Álvarez; n'Institucional, Elsa Valle; n'Economía y Emplegu, Ángela Vallina; n'Igualdá, Begoña Collado; n'Árees, Silvia Iglesias; en Programes y Formación, Leticia Gil; en Memoria Democrática, Concha Masa; en Rellaciones colos Medios y Análisis, Alejandro Suárez, con Carlos Penalva como axuntu de Comunicación, Redes y Mensaxe; en Polítiques de Mocedá, Álvaro Granda; y n'Estensión y Afiliación, Julio Antuña.

Mentes, la Comisión Colexada nueva, ellaborada tamién de forma proporcional a los resultaos del 26 de setiembre, esto ye, un 61 pola llista de Zapico y un 39 por cientu pola de Juan Antonio González Ponte, compónenla les persones siguientes: Zapico, Vallina, Iván Álvarez, David Alvarez Alvarez, Gabriela Álvarez García, Laura Álvarez García, Teresa Álvarez. Luis Álvarez, Antuña, Katia Argüelles, Adrián Arias Mieres, Gonzalo Bengoa, Mónica Capín, Collado, María Soraya Casares, Ana Castaño, Ana Díaz, Rolando Díaz Ordóñez, Fernando Díaz Rañón, Javier Espejo, Rosa Fernández, Juan José Fernández Fernández, Beatriz Fernández Prieto, Eder Fonseca, Maximino García, Carlos García Penalva, Ángel Manuel García Vega, Gil, Ángel González Álvarez, Llarina González Moreno, González Ponte, Granda, Iglesias, Antona Luengo, Masa, Rosario Menéndez Fernández, María José Miranda Fernández, Sara Paz Suárez, Ada Riesco, Faustino Sabio, Alejandro Suárez, Alberto Tirador, Elsa Valle y Anibal Vázquez.

Na semeya, el coordinador xeneral Zapico.