IX-BA-LV ofrezse a siguir dialogando cola FSA

El coordinador xeneral d'Izquierda Xunida, Jesús Iglesias, ofreció-y ayeri otra vegada a la Federación Socialista Asturiana recuperar el diáloguy francíu con vistes al llogru d'un pautu de gobiernu de les fuerces parlamentaries d'izquierda, ello dempués de que'l presidente Areces y los dirixentes de la FSA dieren toa conversación por finada y anunciaren que trabayaben na creación d'un executivu socialista dafechu. Jesús Iglesias, qu'afirmó que la sociedá asturiana "nun se resigna a que nun haya alcuerdu" anque recordó que la propuesta que-y fexere'l fin de selmana pasáu la FSA pa formar gobiernu yera insuficiente. Iglesias aseguró que "namás la derecha y sectores empresariales se declararon contentos pola falta d'alcuerdu en busca d'un gobiernu d'izquierda".

Anque la francedura de negociaciones a nivel asturianu podría afectar a los alcuerdos yá llograos ente FSA y IX-BA-LV a nivel de conceyos, la coalición d'izquierdes nun va a tomar nenguna decisión hasta que s'aclare la formación del Gobiernu asturianu y el presidente Areces aclarie les sos intenciones nel debate d'investidura que tien de celebrase los díes 5 y 6 de xunetu. Con too y con ello nun se descarten gobiernos de coalición col PSOE en conceyos como Xixón o Avilés anque'l pautu autonómicu nun tenga llugar. En cualquier casu, y lo mesmo que yá alvirtiere Jesús Iglesias a nivel autonómicu, IX-BA-LV namás se plantea nestos conceyos los escenarios de ser gobiernu o de facer oposición, descartando los alcuerdos puntuales.